Tin por lo menos un fraccion den parlamento cu no ta contento cu e abolicion di sclavitud. Ta trata di fraccion MEP, kende t’e mesun fraccion cu ta sostene gobierno. Di un banda ta vocifera nan preocupacion riba e desaroyo aki y otro banda hasta ta participa.
E parlamentarionan na Aruba di MEP a emiti un relato di prensa indicando cu nan no lo asisti n’e ceremonia conmemorativo di 160 aña di abolicion di sclavitud y di otro banda, Minister Plenipotinciario, mr. Ady Thijsen si a asisti, kende ta mesun MEP. Minister mr. Xiomara Maduro a biaha bay te Corsou pa atende y participa na ceremonia den cuadro di e topico aki y bo ta haya Minister Ursell Arends di e mesun coalicion a bay te Surnam pa atende n’un ceremonia di Keti Koti.
Di otro banda, a acerca secretario di estado, drs. Alexandra Van Huffelen na aeropuerto prome cu subi avion rumbo Hulanda. E tabata na Aruba p’un biahe di trabou, caminda a sinta cu conseho di minister, a papia di entre otro; refinanciamento y tambe ‘Rijkswet.’ Ta obvio cu e “reach” cu e fraccion di MEP tin no ta mucho grandi. E secretario di estado no tabata na altura mes di nan declaracion.
E tabata sorpendi di e declaracion aki y a bisa cu recientemente hasta Rey S. M. Willem Alexander a pidi disculpa na tur cu sclavitud por tabatin influencia riba nan, esaki ta mesun idioma cu gobierno Hulandes a papia caba, pues Rey a subray’e. Cu MEP no ta contento y tin dificultad cu e aceptacion y hasta ta bisa cu nos ta bibando den sclavitud moderno, ta puntonan cu e secretario di estado ta habri pa papia cu nan riba dje.
