Dia 20 di september, 2020 e organisacion den fundacion Scoutnan Veterano di Aruba a haci un reconocimento na Misa Metodista na San Nicolas na algun ciudadano.
Ta trata aki di Olivia Mercedes Bryson; Naise Ardan Lee y Sandra Vera Wilson. Debi na motibonan personal sra. Wilson no por tabata presente na e ceremonia.
A honra nan den un forma protocolar y emocional pa nan hopi aña di servicio y trabou duro pa hobennan di San Nicolas como lidernan di scout pa e gruponan di scout St. Joris y Arowakken den e bario.
Rita Sandiford a guia e ceremonia y a haci entrega di un plakkaat como aprecio pa nan trabou boluntario.
Durante e ceremonia religioso reverendo Calvin Greenaway di Misa Metodista di San Nicolas a dirigi su mes na esnan honra den un forma impresionante y duna nan bendicion.
Despues di e servicio religioso, a tene un encuentro na auditorio di John Wesley unda cu Scoutnan Veterano di Aruba a honra Rita Sandiford pa su trabou duro dedicao na mantene e movemento di scout na bida pa e drumbandnan di Scout Veterano di Aruba y Arowakken.
Na e ceremonia tabata presente Alto Comisionado Christopher Lake y Comisionado John Hessen, di Scouting Aruba, kende tambe tabatin palabranan bunita y yen di inspiracion pa e personanan honra y finalmente a haci entrega di un regalo como aprecio.
E ceremonia a cuminsa cu un parada di banda di scout marchando. E tabata un presentacion cortico pero placentero di e drumband. Por a sinti cu e espirito di scout tabata bek bou di e miembronan di e banda.
Por a mira caranan conoci den e seccion di drum: Daniel Van Heyningen , Kenneth Carty, Clyde Burke, Nikita Carty, J.J Carty y Elvin Krind. E seccion di brass tabata consisti di Juny Halley, Marlon Wong y Timothy Lake. E “Maître” na e ocasion aki tabata Rita Sandiford. Gradicimento special ta bay na Pedro Wilson, Mervin Dinzey, Leonardo Carty y Christopher Woods.
Scoutnan Veterano di Aruba tin plannan grandi na caminda y publico lo haya informacion di nan proximo actividadnan.