Recientemente e federacion di ahedrez Arubano a busca sr. Jose Sequera for di Venezuela cu ta un maestro International y entrenador profesional cu mas di 20 anja di experiencia. Pa mas o menos 3 siman, sr. Sequera a bini Aruba pa asina duna entrenamento y guia profesional na nos hungador y dirigentenan. Mester bisa cu e federacion a plania pa sr. Sequera stimula mas hende na Aruba sera conoci cu e deporte mental aki y dicon esaki ta un deporte bon pa tur hende eherce. Tur esaki mas cu claro ta pa engrandese e deporte di ahedrez na Aruba cu den e ultimo añanan na varios ocasion a haya e oportunidad unico di representa nos dusho isla den exterior esaki den torneonan regional, continental y mundial. Na banda di esaki SVA/FAA (Schaakvereniging/Federacion di Ahedres) ta organisa nan propio torneonan local sin lubida e torneonan internacional manera e Aruba Chess Open y Dutch Caribbean Chess Championship cu participacion di varios pais den nos rrgion y continente. E deporte di ahedrez mundialmente ta conoci pa su influencia positivo riba e desaroyo y abilidad cognitivo.
Den e tres simannan aki sr. Jose Sequera lo tin diferente clinica cu e unico meta pa mira si tin interesadonan cu lo ta interesa den e deporte. Mirando e interes den e ultimo añanan no tin duda cu mas y mas mucha y hende grandi lo participa na e tayer aki. E tayer ta wordo duna na clubhuis di SVA/FAA na Nieuwstraat 11 (tegenover di Botica Oduber).
Un danki sigur na Lotto, e Loteria di Aruba pa medio di Comision di Subsidio cu a yuda subsidia pa trece un entrenador internacional pa engrandese e deporte di Ahedrez.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio
