E regatista di windsurf procedente di Aruba Sarah-Quita a duna un presentacion durante e reunion di prensa na Boot Düsseldorf den e stadion di futbol di e club Fortuna Düsseldorf.
Düsseldorf – E regatista di windsurf Arubiano Sarah-Quita Offringa diamars ultimo tawata di bishita como huesped di e organisacion di e Tradeshow di Deporte Aquatico Boot Düsseldorf. Den e stadion di e club di futbol Fortuna Düsseldorf e Arubiana di 27 anja di edad a conta na mas di 100 reportero procedente di henter Europa tocante di su gran passion cu el a comberti den su ofishi.
“Mi a cuminsa na edad di nuebe anja Sarah ta relata. Na cuminsamento mi no tawata sirbi den windsurf. Mi ruman homber mayor tawata tentami ta dal buelta rond di mi manera nada. Un anja despues mi a logra y a hanja e gana di windsurf como cu e regatistanan ora nan ta ariba laman nan ta hiba bataya cu otro pero kant’i laman nan ta amigo di otro. Esey mi a hanja tremendo . Bo ta vicia na windsurf , como cu ora bo subi riba e tabla y biento yena e vela bo ta gara velocidad, un sentimento magico ta drenta bo curpa y e sentimento ey ta dunami un kick tremendo cada biaha di nobo.
SQ Offringa a conquista 15 biaha un titulo mundial di Professional Windsurfers Association den e differente disciplina manera: Slalom, Ola y Freestyle. Actualmente e ta number #1 den freestyle despues di e eventonan na Portugal y Fuerteventura. Na cuminsamento di October proximo e ta termina e temporada di competencia na Allemania na e isla Sylt.
Pa motibo di windsurf mi a viaha rond mundo di Islandia te Australia Sarah ta conta cu entusiamo.”Mi a descubri hopi lugarnan bunita cu diferente hende y culturanan cu tin un otro manera di biba y pensa.
Sarah-Quita tin gana di competi contra e regatistanan masculino. Ya a inicia cu esey segun Sarah ora cu a logra habri caminda pa promer biaha na recompensa homber y muher igual den premiacion durante e evento na Gran Canaria.
Ariba un pantaya grandi a pasa potret di accion di Sarah-Quita y un parti di e documentario di su bida como windsurfista cu a ser filma tres anja pasa titula “Cabeibusha”. (cabei “salvahe” busha cu ta e apodo cu su tata a dunele).
Cu su prestacion Sarah-Quita a contribui na e esfuersonan di Boot Düsseldorf pa atrae e publico hoben pa ta interesa den deporte aquatico, como e prospecto cumpradornan di boto den futuro.
E reunion di prensa tawata tin como meta pa introduci e campaña publicitario nobo “Follow the call” y pa duna un splicacion di e diferente actividadnan durante e bootshow. E actividad mas grandi na mundo den ramo di deporte aquatico cu anualmente ta atrae 250.000 bishitante ta tuma lugar pa di 50 biaha desde dia 19 te cu 27 di januari 2019.
