Pueblo ta preocupa pa tur e situacionnan cu cada dia ta saliendo for di control y e gobierno aki Gabinete Wever-Croes II keto bay cu un mentalidad mediocre y cruel.
Nos hendenan pasando den momentonan dificil, manera pobresa, hamber, poco entrada, desempleo halto, miedo di expresa, persecucion politico, medida y mas medida, poco oportunidad, mucha cu no por haya educacion y un gobierno tirano sin ningun sorto di empatia pa su mes un hendenan.
MEP y Raiz keto bay ta frega e pueblo den su cara cu nan por haci y deshasi, pasobra ni cuanto mayoria di e gremionan den tur area a y ainda ta hala Gabinete Wever-Croes II nan atencion tocante e situacion actual y cu tur e consecuencianan cu esakinan lo tin na largo plaso, nan ta keda malgasta placa di pueblo den tur forma cu nan ta hanja ta bon. Ni e parti mas sensativo di un pais cu ta proteccion y educacion pa tur mucha a pone Gabinete Wever-Croes II reconsidera nan posicion como gobierno y pone nan man na nan curason.
Gabinete Wever-Croes II pa por presenta un presupuesto lo haci un recorte di miyones atrobe den enseñansa y husticia. Gabinete Wever-Croes II ta prefera di recorta den esaki cu baha nan propio gasto di personal. Asina creando mas peso den areanan di educacion y social, cual ta pone vooral e maestronan den un posicion preocupante mirando cu pa basta tempo caba nan tin retonan dificil pa cu e muchanan.
Scuchando opinion di diferente docente por a constata e diferente problemanan den enseñansa:
- No tin placa, consecuencia cu e muchanan no tin material esencial cu nan tin mester. Si nan bay corta den enseñansa lo bai tin menos material atrobe. Bv. cosnan basico manera e bukinan di methode entre otronan.
- Pa via di placa mayornan cu tampoco tin suficiente mester percura pa material di scol incluyendo laptop cu no ta barata, na unda ya caba nan ta cremenchando tanto den cas como pa material pa scol.
- Maestro cu tabata yuda nan muchanan for di nan mes saco no por haci esaki mas. Apenas nan por cuida nan mes y nan famia.
- Instancia cu tabata yuda nos muchanan no por yuda e cantidad di mucha mas pa falta di placa.
- Pobresa ta aumentando tanto fisico como mental.
Hopi famia nan placa no ta yega fin di luna y e muchanan tin hamber, nan tin cu wanta hamber of depende kende lo duna nan algo. Muchanan ta wordo exigi pa siña pero nan no tin e condicion nan sano, mientras placa ta wordo gasta den diferente comision y lezingen y tur tipo di workshops. Mucha ta birando flaco nos dilanti pasobra no tin suficiente pa come na cas. Mentalmente e muchanan ta preocupa pa nan mayornan y nan rumannan, nan ta laga di ta mucha pa cuida nan famia.
- Socialmente un Domino effect/Boomerang effect.
No tin suficiente placa pa pueblo, famianan tin hamber y hopi biaha esaki ta hiba nan na comete cualkier delito pa yuda nan mes y nan famia. Hopi ta kita for di scol pa por sobrevivi, educacion ta keda atras. Mester yuda eleva nan mes pa nan sali di e spiral nan ta bibando aden.
NO tin placa pa haci innovacion den enseñansa, ta parce cu innovacion NO ta wordo acepta pa e gobierno aki . Unda e Innovacion pa pueblo su futuro ta keda pa e gobierno aki?
Ta un berguensa pa wak con e gobierno MEP/POR/RED y actual gobierno MEP/RAIZ ta sigui mal gasta placa di pueblo y manipula tur instancia te yega asina leu di manipula Hulanda, unda awe nan mes no otro partidonan, pero nan mes a demostra cu nan no merece di ta esnan cu ta representa pueblo Arubano, poniendo Aruba den bista di Reino riba un posicion di desconfiansa den nos aparato gubernamental y capacidad pa por sigui dirigi nos isla den un forma responsabel y husto pa un y tur.
Nos por a ripara ultimo tempo caba e gobierno actual ta bezig cu diferente cumbre na diferente nivel, unda nan ta bin cu topiconan di invercion, innovacion, Reinnovacion, cual tur ta cai bao e capa di Futura como e instancia di gobierno pa cu innovacion.
Awe pueblo por a wak riba facebook y otro medionan di comunicacion e asina yama Aruba Innovation Summit organisa pa Futura unda Prome Minister Eveline Wever Croes a papia di su personal Reinnovation Journey. Sorto di cumbre asina sigur ta digno di elogia pero solamente si e gobierno mes tin e dignidad moral pa papia di esaki pasobra nan a inverti, nan a innova y reinnova den nos pais. Pero cu cua cuero di cara bo por haci un gasto asina grandi y vooral papia di INNOVACION unda e gobierno aki mes ta e prome cu tabata contra e desaroyonan innovativo y sostenibel. Esnan formando e gobierno aki tabata contra un parke di molina di biento durante gobernacion anterior y awor cu e hedging y fuel oil a boune back riba nan, awor si ta ideal un parke di molina di biento pero unda atrobe? San Nicolas!!
Pa Gabinete Wever-Croes I y II invercion den Aruba y nos hendenan awordo categorisa como “Mega debe”. Contrario na esaki nos por bisa cu esaki tawata MEGA Inversionnan pa TUR hende na Aruba. Nan a hasta grita cu hende no ta come klinkers unda esaki ta exactamente un ehempel di e tema cu e cumbre aki a hiba na Renaisance. Projectonan manera pega klinkers ta exactamente lo cual a trese trabao memei di dificultad pa asina varios famia por a haya un entrada y biba dignamente cu nan trabao, nan por a bai un supermarket y cumpra cuminda. Ora un gobierno bin cu sorto di cumbrenan asina aki ta paso bo ta motiva nos hendenan pa hasi parti di un cambio cu abo como gobierno ta ehempel di dje.
Pero den e caso aki pueblo ta keha tur dia cu no tin placa, costo di bida ta halto y MEP/RAIZ ta corta den tur skina cu nan ta haya ta bon y haci mal uzo cu placa di pueblo. Ta di cua Innovacion e gobierno aki ta papia di dje? Dicon e cumbre aki no a wordo haci pa innova den enseñansa. Dicon en bes di bay corta un biaha mas miyones den enseñansa no a presupuesta extra miyones den enseñansa pa asina por papia di actonan na bienestar general y no bienestar propio unda ta purba make up e realidad cu bunita palabra pero sero Innovation pa cu Aruba y futuro di nos tur.
