E habitantenan di Saliña Cerca a cera cabes hunto y demostra nan malcontento. Ta trata di un pos di awa dushi cu ta existi pa mas di shen aña caba. Parce, cu gobierno a otorga un ciudadano e tereno pa cual na su turno a bende c’un stranhero.
E stranhero ta cla pa cuminsa construi riba e tereno. E habitantenan no ta acepta pa elimina nan pos cu ta provee centenares di agricultor local cu awa. Maria Damon-Tromp tambe a uni na e accion. Pa Tromp, e ta un momento sentimental mirando cu el a lanta den bario y a mira e importancia di pos aki. E pos ta conserva no solamente pa su famia sino pa hopi hende mas.
Mas o menos un aña y mey pasa a yega un meneer Mericano n’e tereno pidiendo tur hende pa kita nan auto for di su tereno. Nan a haya masha straño, mirando te unda cu nan sa, e ta un tereno conserva pa DIP. En fin, a resulta cu un ex-minister a otorga un bon campañado di dje e tereno cu na su turno a bende.
Tromp e tempo ey a bati alarma na ex-minister Otmar Oduber. Oduber a presenta su mes na sitio y a mira e importancia di e pos. E delibera cu e Mericano y a dun’e un opcion pa un otro tereno. Locual Oduber no a haci ta; percura pa nunca mas un hende yega na poder di e tereno aki. Segun Tromp, el a compronde cu e persona cu ta doño di e tereno of cu a ricibi e tereno for di gobierno ta trata di un señora di fam Figaroa. Cual ta su propio bisiña.
Un siman pasa a yega un otro persona, e biaha aki un Hulandes informando cu e lo desaroya riba e tereno. Mesora a bay den accion y informa tur cu ta haci uzo di e pos aki, cu ta provee awa dushi pa hopi persona.
A hasta yega na porta di Minister Ursell Arends. E pos tin su historia y ta di sumo importancia pa conserv’e. Na su turno, den presencia di un grupo grandi di ciudadano di Saliña Cerca, Minister Arends a confirma cu nan lo cuminsa e proceso pa delibera cu e doño di tereno y dun’e un otro opcion. Despues cu esey pasa, lo kita e tereno di Figaroa y pas’e over pa Santa Rosa. Tur cos ta mustra cu e tal Figaroa a bende e tereno dos biaha, segun Tromp a comenta.
“E preocupacionnan di nos ciudadanonan encuanto e pos di awa dushi na Saliña Cerca tin Gobierno di Aruba su atencion”, asina Minister Ursell Arends a comenta durante su presencia dilanti e grupo di ciudadano preocupa.
