Ta conoci pa nos tur esunnan cu a sali for di boluntad di Dios y e consecuencia cu e tabatin pa nan biba. Adam y Eva. Tur e hendenan cu no a scucha di Noe. E pueblo di Israel cu a murmura y pasa cuarenta aña den desierto y hopi a muri den desierto. Sodoma y Gommora. David. Jonas. Ta pa djis menciona e casonan di mas conoci.
Esunnan cu ta biba pafo di boluntad di Dios, ta perde nan bendicion, pasobra ni maske con sabi of con rico un hende porta, boluntad di Dios ta sumamente importante y mester tin prioridad den nos bida.
Si bo tin un persona den bo bida cu ta aleha bo for di e boluntad di Dios, no gaña bo mes. Por fabor aleha bo mes for di e persona, no ta importa ken e ta.
Pasobra mañan cu Dios kier den e momentonan dificil di malesa of situacion preta di bida, e persona ey no por yuda bo, ta na Dios mes bo tin cu sclama.
* Tin caminda cu ta parce bon den bista di hende, ma e fin ta e caminda di morto. (Proverbionan 14:12).
* Palabra di Dios ta bisa nos den Romanonan 12:2: No sea conforme e mundo aki, ma sea transforma pa medio di e renobamento di boso mente, pa boso por comproba kico ta bon y agradabel y perfecto boluntad di Dios.
Nos mester busca urgentemente e boluntad di Dios pa nos bida, y esey ta nos salbacion, pasobra mañan no ta primiti na ningun hende.
Pasobra esun cu ta haci malo, lo ricibi e consecuencia di e maldad cu el a haci y esey sin distincion di persona. (Colosensenan 3:25)
Pasobra esaki ta e boluntad di Dios, boso santificacion, esta pa boso abstene boso for di inmoralidad sexual, pa cada un di boso sa con pa tene su mes curpa den santificacion y honor y no cu pasion di deseo carnal, manera e paganonan cu no conoce Dios. (1 Thesalonisensenan 4;3-4)
Pasobra Mi sa e plannan cu mi tin pa boso, Señor ta declara. Plan pa paz y no pa calamidad, pa duna boso un futuro y un speransa. Anto boso lo sclama na Mi y bin haci oracion na Mi y lo Mi scucha boso y boso lo busca mi y boso lo haya Mi, ora boso busca Mi di henter boso curason.
Ora nos busca e boluntad di Dios pa nos bida, nos lo ripara e diferencia mesora entre bon y malo, pasobra ta sali na cla si nos ta den e plan di Dios pa nos bida si of no.
E plan di Dios no ta pa un hoben ta bende of uza droga, cana cu arma, keda sin bay scol, bira bandido y cay cera etc. Pero si algo asina sosode pa motibo di cabesura y no ta tende di su mayornan, e no mester keda den e situacion ey, pero mester busca e boluntad di Dios pa su bida door di arepenti y aparta for di su mal caminda.
Regosiha semper. Haci oracion sin stop. Sea agradecido den tur cos, pasobra esaki ta e boluntad di Dios pa boso den Cristo Hesus. (1 Thesalonisensenan 5:18).
P’esey no tira boso confiansa afo, cual tin un gran recompensa. Pasobra boso tin mester di perserverancia, pa ora boso a haci e boluntad di Dios, boso ricibi loke a wordo priminti. (Hebreonan 10:35-36).
No laga e boluntad di hende pasa riba di e boluntad di Dios pa bo bida, corda cu Dios ta Soberano y E ta goberna mundo.
Sinceramente, Pastoor Marcel Balootje.
