Dios a crea tur hende segun Su mes imagen, segun e imagen di Dios E a crea hende homber y hende muher E a crea nan, Anto Dios a bendiciona nan y Dios a bisa nan : Sea fructifero y multiplica y yena e tera y haci esaki somete na bo y goberna riba e piscanan di laman,y riba e parhanan di cielo, y riba tur ser bibo cu ta move riba tera.
Ora pica a drenta mundo pa medio di satanas e situacion a cambia, pasobra pica ta orguyo contra Dios, y e ta trece separacion entre Dios y hende.
Na e momento cu Dios a yama Adam cu Eva, ningun di nan dos a arepenti, pero a tira falta riba Dios, pasobra Adam a bisa Dios cu ta e muhe cu Dios a dun’e a pone peca, y Eva a tira falta riba e colebra.
Tur hende sa cu e deseo orguyoso di Lucifer a pone lanta contra Dios, hunto cu un tercera parti di angelnan, pasobra e kier a sinta riba e stoel y compara su mes cu Dios.
Locual ta para skirbi den Ezekiel capitulo 28 :12 te cu 28:19 ta duna nos tur splicacion ken e diabel ta y ta na unda tur cos a bay robes, pa asina evita cu hende ta duna nan mes un nomber robes.
Si nos por mira, tene cuenta, y rasona un cu otro tin dos tipo di orguyo, tin un orguyo positivo, y tin un orguyo negativo, terenal diabolico.
Laga nos cuminsa na prome luga cu e orguyo positivo
Pronto hopi mayor , cual nos ta desea pa ta tur mayor lo bay scol contento pasobra nan yiu a bay over pa otro klas, of e mucha a gradua y tin cu bay ricibi su diploma. Esey ta pone hende sinti su mes contento y orguyoso pa motibo di un gran logro.
Nos tur cu ta biba den Caribe Hulandes, cual antes tabata Antias ta masha contento y orguyoso di e cantidad di hobennan di Caribe Hulandes cu ta hungando Baseball den MLB, birando embahador deportivo pa nos.
Pasobra antes tabata dificil pa nos , semper nos ta tende di hombernan grandi di baseball cu ta Cubano, Portoriqueño, Venezolano, y no lubida riba e propio Americano.
Awor aki nos muchanan local demostrando nan Fe,disciplina, integridad y determinacion ta riba caminda , pa bira miyonario y multimiyonario a base di e contractnan cu wordo firma.
*Awor e orguyo negativo, terenal, diabolico a cuminsa for di den Genesis 3 caminda nos por mira con pica ta separa hende for di Dios, y pa e motibo ey e igualdad cu tambe tabata existi den un principio a wordo kita for di tanto hende muhe como hende homber por fabor lesa Genesis 3:16 te cu 24. Pasobra e naturalesa cu nan tabata goberna den principio ( Genesis 1;28) a bira contra nan.
*Orguyo negativo, pecaminoso, terenal y diabolico, ta ora nos ta consciente di nos maldad y cu nos ta bay contra boluntad di Dios, pero toch nos ta continua den dje, y no kier arepenti, buscando destruccion pa nos mes.
*E enemigo di nos alma ta pusha hende diariamente pa bay contra boluntad di Dios y haci cosnan cu no ta cumbini, (Romanonan 1: 18-32).
Dios su plan di Salbacion ta wordo ofreci na tur hende,(Juan 3:16) Dios no tin faborito, pasobra Dios sa cu tur hende a peca, y ta falta e gloria di Dios. No tin ningun hende bon riba e mundo aki, tur hende mester di Cristo Hesus.( Efesionan 2:8-9).
Skirbi pa Pastoor Marcel Balootje
