Esun cu kere lo ta salba, y e esun cu no kere lo ta condena, esey ta locual e palabra di Dios ta splica nos hopi cla den Juan 3:16-18, no tin distincion di ningun hende, ni tampoco e genero moderno , pasobra salbacion ta gratis pero e no ta barata, Cristo Hesus a entrega su bida pa nos salbacion.
Tur hende cu arepenti di henter nan curason, kere y acepta Cristo Hesus como nan Señor y salbador lo ta salba. No ta cumbini ningun hende keda sin acepta e plan di salbacion di Dios, pasobra esun cu rechasa Cristo aki na mundo, su tata den shelo tambe lo rechas’e.
Si bo bista ta riba hende, bo no por alcansa e salbacion di Dios, pasobra hende no por salba ningun hende, solamente den Cristo Hesus tin salbacion. Salbacion ta personal , ningun hende no por entrega nan bida na Dios pa bo, ta un decision cu mester tuma awor cu bo ta na bida, pasobra ora bo muri nada mas no por ahusta.
E lucha entre bon y malo , entre e diabel y Dios, ta pa hende rechasa e bondad di Dios y permanace den e scuridad di mundo cual na final su destinacion lo ta fierno. Aunke e situacion di mundo ta yen di maldad y inmoralidad , Dios ta demostra den su gran amor cu e no kier pa ningun hende bay perdi, ( 2 Pedro 3: 9).
Pasobra e pago di pica ta morto,ma e don di gracia di Dios ta bida eterno den Cristo Hesus nos Señor. ( Romanonan 6:23). Si nos confesa nos pica, Dios ta fiel y husto di pordona nos, nos picanan y libra nos di tur inhusticia. ( 1 Juan 1;9). Tin solamente un mediador entre Dios y hende y esey ta nos Señor Cristo Hesus, pasobra no tin otro manera pa yega serca e Tata sino ta pa medio di e Yiu. Hopi hende ta bibando un bida sin Dios, un bida den cual nan ta biba pa nan mes, den tur clase di malicia y maldad. Dios tene misericordia.
Hopi ta esnan cu ta rechasa Dios cu pensamento y actitud, pasobra e enemigo tin nan gaña y mara den inmoralidad y abominacion, y mas tristo cu ta nan kier atrae otronan den mesun caminda di perdicion. Despues cu nos entrega nos bida na Cristo nos mester persevera den caminda di Dios, y asina evita di cay den tentacionnan cu mundo ta ofrece, pasobra esun cu perservera te na final esey lo drenta shelo.
Flohera y cobardia lo no hereda reino di Dios, ma humildad y disponibilidad lo traha caminda di entrada cerca Dios.
Ta tempo pa nos traha riba nos salbacion, y tambe riba salbacion di nos Famia, pasobra e boluntad di
Dios ta pa nos por bisa manera Josue., ami y mi cas ta sirbi Señor. Tur esnan cu a ricibi’e na nan E a duna derecho pa bira yuinan di Dios, esnan cu ta kere den Su nomber. Ta facil pa kere den Señor, ta facil pa glorifica su nomber, ta facil pa reconoce y stima Cristo Hesus, pasobra no tin otro caminda, Cristo Hesus ta e Rey di Reynan y Señor di Señornan. Pero hopi ta scohe pa e caminda hancho cu ta hiba na perdicion, y lo wordo decepciona, door di a rechasa , neglisha of boluntariamente a ninga Cristo Hesus.
Pasobra si nos kere den nos curason y confesa cu nos boca cu Hesus Cristo ta Señor nos lo ta salba.
Sinceramente , Pastor Marcel Balootje.
