Nos no sa con pa cuminsa nos relato di e siman aki. E tema ta e di 30 aniversario di Step by Step Dance Academy. Un tema di fiesta glorioso, un tema bunita y positivo briyante di bunita logronan di e academia de baile aki. Pero mi curason a bira tristo ora Lady Ruth a tende cu e gentil cabayero Humphrey M. Lauffer, e pareha dinamico cu ta semper banda banda sam sam cu su bunita esposa, instructor y maestra profesional di baile, lieve Sonia Gevers di Step by Step, no t’ey cu nos mas den e mundo fisico aki.
Nos tawata na Hulanda fin di aña pasa pa 3 luna a peticion di famia y atrobe na lunanan di mei y juni y ta awor nos a haya sa cu Humphrey a bay nos dilanti na luna di november di aña 2021. Nos a sinti tristo, pero despues e musica, luz, alegria y baile a yena e sala di Cas di Cultura cu tawata completamente yen di un publico tur entusiasma. E bos firme di Sonia, cu a anuncia e comienzo di e show pa celebra di 30 aniversario di Step by step Dance Academy cu sintimentonan tierno di amor y anuncia cu ta e prome presentacion den Cas di Cultura sin su esposo, hayando falta naturalmente di su kerido esposo a toca mi curason.
Lady Ruth a sinti pa yora hunto cu n’e e momentonan ey y a manda pensamentonan di forsa y amor den su direccion. Un muhe fuerte cu awor tin cu sigui su baile den bida sin Humphrey, su pareha di hopi aña. Despues nos tambe a realisa atrobe cu ta asina bida ta, cu su ups and downs, baby ta nace, adulto of grandi den edad ta fayece. Y…nos tur tin cu cruza e brug ey un dia pa bay bek cerca e Creador di Amor.
Lieve Sonia, Lady Ruth a scoge pa no a bin patras di stage pa felicita bo cu bo tremendo y bunita show pa nos dos no end up ta yora, aunke mi sa cu bo bunita curason tawata yora. Mi a logra saca dos pic di dos di bo alumnonan den nan bunita paña den e foyer di Cas di Cultura, y mi a pidi un bunita amiga di mi, lieve Corine, wak si e por a logra haya algun potret mas di e show.
Mi sister friend Corine y un otro amiga sis Vanessa tambe a baila den e show di 30 aña di Step by Step. Un show di kita sombre! Un show maraviyoso cu bailenan super bunita, tur bailadornan den pañanan super super bunita! Di chikito bay grandi den edad, tur tur a luci den nan alegria y elegancia! Bunita luz cu a sali for di paden bay den cada expresion.
Nos pabien di curason na henter e grupo, incluyendo tur esunnan cu a traha riba e fantastico coreografianan, e instructors, mayornan y studiantenan cu a yuda, e tecnico di zonido, etc. Y…un bearhug grandi diki gordo pa Queen Sonia mes, nos Reina den Baile, un maestra profesor cu seriedad y dedicacion. Un hende muhe fabuloso! Nos no ta lubida nunca con bunita Sonia Gevers a siña un grupo di scout mucha homber teenagers baila pa representa nos dushi Aruba den e parti cultural na Merca, riba un jamboree, hopi aña pasa!
Awor tin vakantie. Lesnan lo cuminsa atrobe dia 13 di augustus 2022 den nan studionan situa den curason di Tanki Leendert 249. Lieve mooie Queen of Dance Sonia Gevers, danki pa inspira tur cu kier siña baila, cu bo pasion y amor den hopi disciplina cu ta e streanan firme di Step by Step Dance Studio. Ta e streanan ey ta forma mas streanan bibo riba stage.
*Your Inner Light will shine for ever, dearest and beautiful Lady Sonia Gevers.
*Your Loving Angel is watching over you and yours through nature, sunlight, moonlight and stars
* Aruba, dushi Aruba, danki pa lesa nos relato cu hopi atencion, cuida curpa y stay safe.
