No ta un secreto cu den e seno di e partido berde ta reina un discordia despues di un reunion cu a tuma luga den parlamento pa exonera ex-minister Eddie Briesen. Realidad ta cu tin in division di opinion entre e politica “nobo” y e politica “bieu” den AVP.
Ryçond Santos do Nascimento a duna su opinion despues di a haya sa tocante e condena di 1 aña cu corte a exigi pa su colega di partido. E parlamentario, a haci un peticion pa cada ciudadano bay scucha e sentencia di hues. Tambe el a duna di conoce cu si no tin tempo pa scucha hues, por lesa e sentencia riba e Facebook di Ministerio Publico.
Ryçond no kier a papia mucho pero si a haci un peticion pa scucha e declaracion di Mike Eman. E ta di opinion cu cada persona mester pensa y scucha pa nan mes pasobra asina por ta critico. “Si abo no pensa pa bo mes, e pais aki nunca hamas lo cambia”, Santos do Nascimento a declara.
Pa loke ta su status cu e partido y cu su coleganan el a informa cu “status ta mesun cos”. El a scucha e lider di partido caminda el a declara cu e ta comunicacion diario cu Mike de Meza pero cu Ryçond esaki no ta e caso. Do Nascimento ta para riba cu mester scoge entre berdad y mentira.
