Siman pasa, Jessie Cooley, Directora di Big Bothers Big Sisters (BBBS) di Hampshire County na Massachusetts a manda un invitacion pa miles di hende y negoshi cu tabata bisa, entre otro:”Si bo conoce Ruth Harms, bo sa cu su entusiasmo y compromiso cu e ‘Grandotinan’ y e ‘Chikitinnan’ y nan famia cu ta envolvi cu BBBS ta incomparabel. Awe e ta mes dedica na su trabou cu e tabata tempo cu el a cuminsa30aña pasa…
Ruth a dicidi di retira di Big Brothers Big Sisters na fin di 2020 … Nos lo ta asina tristo di mir’e bay, y nos no por imagina BBBS di Hampshire County sin Ruth … Nos ta preparando pa bis’e ayo na December, pero pa awor nos kier honr’e cu un fiesta asombroso. Un fiesta yen di pret, un celebracion “drive-by” pa Ruth, sin peliger di COVID,riba october 31 cuminsando 1pm.
E fecha pa e fiesta no a wordo selecta pa loco. E ta dia di Halloween, un celebracion faborito di Ruth, y durante su 30 añanan na BBBS el a organisa hopi actividad pa recauda fondo pa BBBS riba Halloween.
E organisadonan di e fiesta a scoge 30 cos cu Ruth ta stima, no necesariamente conecta cu BBBS, y nan a prepara un pakete di regalo pa Ruth pa representa cada uno. Por ehempel, pa su amor pa e Daffodil Run anual pa recauda fondo, nan a prepara un bouquet di flor dafodil. Nan a prepara pakete pa representa e Bowl-a-thon, e Crafts-fair, Gingerbread House, etc. Tambe nan a prepara un regalo pa su amornan personal, manera su amor pa su isla natal Aruba. Segun e autonan yega e entrada di e park, cada un a ricibi un pakete pega na un hilo cu un balon yena cu helium pa nan regala Ruth.
E aprecio di e pueblo di Amherst pa e amor y dedicacion cu Ruth a hinca den Big Brothers Big Sisters den e trinta añanan tabata masha evidente. Un cantidad grandi di miembro di e comunidad, hopi di e ‘Grandoti’ y ‘Chikitinnan’ y nan famia, hasta un miembro di Cas di Representante di Estado Massachusetts a bin mustra nan gratitud.
Un fila largo di auto pitando duro tabata acerca e luga caminda Ruth, disfrasa na Ruth Bader Ginsburg (e hues popular di Corte Supremo cu a muri algun siman prome), tabata ricibi nan. Tur auto tabata decora cu balon y cubri cu mensahe di felicitacion na Ruth, y algun hasta cu bandera di Aruba! Nan tabata carga tambe e pakete di regalo pa Ruth cu nan a haya na entrada di e park.
Na e “corte” di Ruthe autonan tabata para pa entrega e pakete di regalo of haci un donacion na BBBS, y pa ricibi un T-shirt y un yabero souvenir, cortesia di e sucursal na Merca di Aruba Tourism Authority. Tur cos, e decoracionnan di e autonan, e disfrasnan di Halloween, e regalonan cu e hendenan a trece pa Ruth y BBBS, tur tabata indica cuanto Ruth ta nifica pa e comunidad, y cuanto e comunidad ta apreci’e pa loke el a haci pa e muchanan di BBBS na Amherst y nan famia.
Un representante di Legislatura di Massachusetts a trece pa Ruth dos acta oficial. Esun di e Cas di Representante ta pa ofrece un pabien unanime “… y pa reconoce bo trabou ehemplar … y bo retiro despues di 30 aña …” y esun di Senado ta extende pabien na Ruth y ta “… reconoce bo 30 añanan di servicio dedica na Big Brothers Big Sisters di Hampshire County …”.
Ruth Harms a ricibi reconocemento na varios ocasion den pasado. Na 2015, Northwestern Children’s Advocacy Project a presenta Ruth e prestigioso Ellen Sedlis Award cu ta wordo presenta un bes pa aña na “un persona cu a demostra cu su trabou un compromise di termino largo pa yuda muchanan recupera di abuso…”. Senado di Massachusetts a honra Ruth “ …reconociendo su dedicacion resaltante y contribucionnan balioso na Big Brothers Big Sisters durante hopi aña …”
Pa su trabou incomparabel cu BBBS y tambe pa hopi otroo branan social cu, entre otro, a beneficia Aruba como destinacion turistico, Ruth a ricibi condecoracion Lid in de Orde van Oranje Nassau y a ricibi su medaya di honor for di Embahador di Hulanda na Washington, D.C. Na 1996, ATA a nombra Ruth y su casa Dr. Stephen Hickman Goodwill Ambassador pa Aruba.
Ruth y su famia lo ta na Aruba otro luna pa pasa Pasco y Aña Nobo cu su tata, come ayaca y pastechi, tira klapchi, wak vuurwerk, pasa oranan na beachnan y disfruta di tur otro cosnan cu Aruba ta ofrece.
Pa manda un mensahe pa Ruth, su email ta [email protected].
Skirbi pa: Clyde Harms cu ayudo di Tiffany McGeey Sarah Hickman
