Riba 5 di mei ultimo e directora di Biblioteca Nacional di Aruba a ricibi di Rudy Lampe un ehemplar di un compilacion di texto “Na ocasion di binti aniversario di Red Democratico 2003-2023.”
Dia 30 di mei 2003 partido Red Democratico (ReD) a keda funda na Aruba. Kiermen cu dia 30 di mei 2023 e partido aki ta cumpli binti aña di existencia. ReD a drenta parlamento na dos ocasion, di 2005 pa 2009 y di 2017 pa 2021. ReD a asumi responsabilidad den gobernacion di Aruba di 2017 te 2021.
Na ocasion di su binti aniversario ta presenta e compilacion aki di comunicado di prensa di Partido Red. E meta ta pa sirbi esunnan cu ta haci investigacion tocante historia politico di Aruba. E por ta e investigadonan di e universidadnan, tanto local como internacional, e studiantenan cu ta trahando nan tesis of simplemente esunnan cu ta hacie pa hobby.
‘Back to the roots’ ta e idea tras di e compilacion aki, p’esey nos a inclui solamente e comunicadonan di e prome añanan di existencia di ReD. Ta cuminsa cu un lista di tur loke a keda publica den prensa di 2003 te cu 2005 ora ReD a drenta parlamento. Nos ta gradici Carla Paris pa e trabao minucioso di e lista aki. Despues un seleccion di e prome comunicadonan di prensa di e partido ReD cu e ultimo tocante e rol di prensa na Aruba, ya cu pa tin cambio no ta depende solamente di partidonan politico sino tambe di tin un prensa berdaderamente independiente. Pa finalisa ta inclui un copia di e statutonan di Red Democratico, manera publica den Landscourant.
