Pa un luna tin e campeonato di Eurocup 2024, cual ta hunga na Alemania. E ambiente pa mira futbol a inicia na Rembrandtplein Amsterdam, na Hulanda. Pero no ta solamente e Macambanan a yega na Rembrnadplein, pero pareha Rubiano tambe tabata presente pa asina celebra Dia di Tata como tambe mira e wega di Hulanda.
Melvin Kock, Rubiano di bishita na Hulanda, a indica cu e wega tabata interesante, su persona y señora a sinta pafo di un Café. Nan a disfruta di e wega. Kock ta haya cu Hulanda a hunga bon, e defensa tabata basta bon. E victoria tabata un resultado cu el a spera.
Anuscha Falconi, Rubiano di bishita na Hulanda, a conta riba su experencia cu e ta pasando na Hulanda ta uno bon y dushi. Di mira e wega asina aki, ta un experencia nobo p’e y el a disfruta. Nan ta na Hulanda di bishita cerca un yiu y na mes momento a celebra Dia di Tata.
Rutger Boskma, fanatico di Hulanda, a indica cu nan ta sinti contento, cos a bay bon. E ta lamenta cu a spera mas cu e 2-1, pero ta contento cu e resultado. El a indica cu siman pasa el a regresa Hulanda, pasobra pa tres luna el a biba na Corsou, pero dentro di algun luna e ta bolbe bay.
No ta solamente e Hulandes- y Rubianonan a disfruta di e wega na Amsterdam. Un famia di Irlanda tambe tabata presente. E vacacionista masculino a expresa di tabata contento di por a mira e wega eynan y cu Hulanda a gana su prome wega, specialmente riba su dia di hacimento di aña.
Hulanda a sali victorioso riba Polonia cu score di 2-1. Asina aki a piki nan prome tres punto. Hulanda su siguiente wega ta diabierna, 21 di juni pa 3:00 pm (nos ora) contra Francia.
