“Zo waarlijk helpe mij God Almachtig”, cu e palabranan aki mr. drs. Richard Arends a huramenta diamars atardi como Bemiddelaar Arbeidsgeschillen pa islanan BES dilanti e Rijksvertegenwoordiger suplente di islanan BES, esta Jan Helmond. E funcion ta drenta ma vigor desde dia 1 di juli 2024 pa tempo indefini.
Prome cu huramenta, e Rijksvertegenwoordiger suplente di islanan BES a gradici Anselmo Pontilius pa su añanan dedica na sostene y brinda su conocemento na e sector laboral na Boneiro, Sint Eustatius y Saba. El a regal’e un obra di arte den forma di un driekiel, den colornan Caribense. Helmond a reconoce e experiencia y conocemento di Pontilius y con el a brinda asistencia pa trece partidonan hunto. E ta consider’e un biblioteca di conocemento pero cu awo ta bay.
Di otro banda e Rijksvertegenwoordiger suplente di islanan BES a admiti cu e conoce Richard Arends caba y sa cu e ta un profesional. E no ta sorprendi cu el a sali e miho candidato y cu a conta cu sosten unanime na Boneiro. E ta desee exito y ta conta cu su experticio profesional den atende cu e mercado laboral di e islanan. Specialmente na Boneiro ta papia di crecemento, awo cu un isla yegando 26 mil habitante, cu leynan laboral Hulandes cu ta vigente na e isla.
![](https://24ora.com/wp-content/uploads/2024/05/HY3A3635-1920x1280.jpg)
Despues di a huramenta, Richard Arends a bisa cu p’e ta un honor di por sirbi e isla ruman aki como Bemiddelaar Arbeidsgeschillen. E lo no bay biba na Boneiro ainda, pero ta disponibel y lo yega mesora asina cu ta necesario. El a gradici tur esnan cu a sosten’e y a scog’e como Mediador pa e islanan BES. E lo biaha den e siguiente dianan aki mesoa Saba y Sint Eustatius pa topa cu dunadonan di trabou y sindicatonan riba ambos isla.
Nombracion di mediador pa conflicto laboral
Arbeidsgeschillenwet BES ta stipula e funcion di e mediador. Di acuerdo cu e Ministerio di Sociale Zaken en Werkgelegenheid (SZW), e representante di Reino a nombra mr. drs. Richard Arends como mediador pa Boneiro, Saba y Sint Eustatius cuminsando desde 1 di juli 2024. E ta e sucesor di Anselmo Pontilius, kende tabata mediador desde aña 2014.
Un ambiente laboral den harmonia den Caribe Hulandes ta sumamente importante, E mediador lo contribui pa promove esaki. E lo haci esaki, entre otro, mediando entre conflicto dentro di e companianan p’asina evita welga. A demas Arends lo mester contribui na e formacion di acuerdo laboral colectivo y por organisa un referendum a peticion di e empleadonan pa representa nan. Ademas, SZW por pidi e mediador pa conseho riba cuestion di maneho laboral. Mediador no tin ningun rol den e casonan individual.
Durante e proceso di seleccion a participa Ministerio di Sociale Zaken en Werkgelegenheid (SZW) y e representantenan di e organisacion di dunado di trabou y trahado. A nombra Richard Arends debi na su formacion huridico y e experiencia amplio cu e ta conta cu ne, te hasta den e area di relacion laboral. Ademas, Richard Arends ta un persona capaz di construi brug. Lo realisa un introduccion prome cu e inicia cu su funcion oficial dia 1 di juli 2024.
![](https://24ora.com/wp-content/uploads/2024/05/HY3A3682-960x1440.jpg)
![](https://24ora.com/wp-content/uploads/2024/05/HY3A3653-960x1440.jpg)
![](https://24ora.com/wp-content/uploads/2024/05/IMG_2537-1080x1440.jpg)
Tocante Richard Arends
Richard Arends tin un carera distigui den gobierno y como consehero den sector publico y priva pa varios aña. E ta gradua na Universidad di Leiden den administracion publico, specialisa den gobernacion internacional y na Universidad di Amsterdam den derecho Europeo y internacional. Den su carera politico el a sirbi como Minister di Asuntonan Economico y Comunicacion (2016-2017) unda cu el a duna sosten na empresanan mediano y chikito y mehora nan acceso na capital, a modernisa e proceso di otorgacion di permiso pa establecimento di negoshi y a promove posibilidad di haci negoshi entre Europa y Latinoamerica.
Pa e contienda electoral na aña 2017, Richard Arends a subi lista politico di partido AVP, a saca 1390 voto y a bira Miembro di Parlamento di Aruba. Durante e periodo ey e tabata vocero pa fraccion di AVP riba temanan manera finansa publico, asuntonan economico y relacionan di Reino.
![](https://24ora.com/wp-content/uploads/2024/05/IMG_2536-1920x1440.jpg)
Despues di su salida di politica na aña 2021, el a fungi como hefe di e unidad di economia na Entidad Publico di Boneiro y ta asisti dicho Entidad Publico cu proyecto an clave pa desaroyo economico. Recientemente el a duna sosten na e negociacionnan y evaluacion di e leynan constitucional y financiero pa islanan BES. Desde dia 1 di juli e ta Bemiddelaar Arbeidageschillen pa islanan BES.
Richard Arends ta casa y ta tata di tres yiu.
![](https://24ora.com/wp-content/uploads/2024/05/HY3A3645-1920x1280.jpg)
![](https://24ora.com/wp-content/uploads/2024/05/HY3A3646-1920x1280.jpg)
![](https://24ora.com/wp-content/uploads/2024/05/HY3A3599-1920x1280.jpg)
![](https://24ora.com/wp-content/uploads/2024/05/HY3A3625-1920x1280.jpg)
![](https://24ora.com/wp-content/uploads/2024/05/HY3A3608-1920x1280.jpg)
![](https://24ora.com/wp-content/uploads/2024/05/HY3A3617-1920x1280.jpg)
![](https://24ora.com/wp-content/uploads/2024/05/HY3A3603-1920x1280.jpg)
![](https://24ora.com/wp-content/uploads/2024/05/HY3A3614-1920x1280.jpg)
![](https://24ora.com/wp-content/uploads/2024/05/HY3A3615-1920x1280.jpg)
![](https://24ora.com/wp-content/uploads/2024/05/HY3A3623-1920x1280.jpg)
![](https://24ora.com/wp-content/uploads/2024/05/HY3A3626-1920x1280.jpg)
![](https://24ora.com/wp-content/uploads/2024/05/HY3A3627-1920x1280.jpg)
![](https://24ora.com/wp-content/uploads/2024/05/HY3A3633-1920x1280.jpg)
![](https://24ora.com/wp-content/uploads/2024/05/HY3A3634-1920x1280.jpg)
![](https://24ora.com/wp-content/uploads/2024/05/HY3A3643-1920x1280.jpg)
![](https://24ora.com/wp-content/uploads/2024/05/HY3A3609-1920x1280.jpg)
![](https://24ora.com/wp-content/uploads/2024/05/HY3A3628-1920x1280.jpg)
![](https://24ora.com/wp-content/uploads/2024/05/HY3A3606-1920x1280.jpg)