E compania di crucero Royal Caribbean a uni na e otro grandinan di e sector y diamars a anuncia e extension te cu dia 30 di november di e suspension di su biahenan, cu excepcion di e salidanan for di Hong Kong.
E firma a tuma e medida den cuadro cu e protocolnan di e Centronan pa Control y Prevencion di Malesa (CDC) di Merca, cu e “obhetivo comparti” di un “regreso sigur” pa su huespednan, tripulacion y comunidadnan unda nan ta desembarca, segun a señala den un comunicado.
E grupo a agrega cu su marca Celebrity Cruises “tambe lo suspende su programa di winter completo 2020/21 na Australia y Asia,” mientras cu e marca Azamara “lo suspende su biahenan di winter 2020/21 na Australia y New Zealand, Zuid Africa y Zuid America.”
E anuncio di e compania crucero ta sali despues cu CDC a anuncia siman pasa e extension di e prohibicion di navega di e cruceronan cu base den wafnan di Merca, vigente desde maart ultimo, te cu dia 31 di october proximo.
Despues di e anuncio di e entidad gubernamental, e compania crucero Carnival tabata e prome den informa e cancelacion di tur su cruceronan for di wafnan di Merca pa e aña aki, cu excepcion di Miami y Cañaveral na Florida, cu lo ta e promenan cu lo cuminsa cu nan operacionnan entrante november.
Despues Norwegian Cruise Line a sigui Carnival, cu dialuna a laga sa di e suspension tambe te cu dia 30 di november di e biahenan di su tres marcanan di crucero – Norwegian Cruise Line, Oceania Cruises y Regent Seven Seas Cruises – mescos cu Royal Caribbean Group a haci, cu tin un flota total di 28 barco.
Di acuerdo cu e Asociacion Internacional di Liñanan Crucero (CLIA), e actividad di crucero na Merca ta responsanbel di casi mey miyon (421 mil) trabao y ta genera 53 mil miyon di dollar anual den actividad economico den henter e pais.
Cada dia di suspension di operacion di e cruceronan ta produci un perdida di 110 miyon di dollar den actividad economico y di 800 empleo directo y indirecto na Merca, vooral na Florida, Texas, Alaska, Washington, New York y California.
Solamente na Florida, cual motor economico ta turismo, e dañonan pa e seis lunanan di paralisis di e industria di crucero ta cay den 22 mil millón di dollar y e perdida di 169 mil trabao.
Onderschrift potret: Cada dia di suspension di operacion di e cruceronan ta produci un perdida di 110 miyon di dollar den actividad economico y di 800 trabao directo y indirecto na Merca, vooral na Florida, Texas, Alaska, Washington, New York y California. EFE/John Riley/Archivo
