24 oktober a conmemora e World Polio Day. E dia aki a wordo dedica door di Rotary International pa conmemora e fecha natal di Jonas Salk, ken a lidera e prome team cu a traha un vacuna contra poliomyelitis.
Poliomyelitis ta un malesa altamente contagioso cu ta afecta mas tanto mucha mas jong cu 5 aña di edad. Polio, manera e ta wordo jama ta un virus cu ta contagia di persona pa persona. E virus ta pasa tipicamente via awa contamina pero tambe e por pasa door di spetters ora bo tosa of nister. E por ataca e sistema nervioso di un persona, y den cierto caso, por causa paralitis.
Aunque no tin cura te awe, ta existi un vacuna cu ta sigur y efectivo. Ta e vacuna aki Rotary International hunto cu su partners a husa pa inmunisa over di 2.5 billion mucha na mundo. Rotary International, World Health Organization y UNICEF a cuminsa cu e iniciativa mundial pa elimina Polio na 1988. Desde cu a cuminsa e accion contra Polio, a logra reduci e cantidad di casonan di Polio cu 99.9%.. Awe tin menos caso di Polio cu nunca antes den mundo. Pero no por stop awo! Mester yega na sero (0) caso esaki ta e meta di Rotary International. Si no elimina Polio, milles di mucha por keda paralisa.
Na e momento aki tin solamente 3 pais na mundo na unda tin Polio. Esaki nan ta Afganistan, Pakistan y Nigeria.
Na aña 2017 a registra na:
– Afganistan 6 (2014: 28)
– Pakistan 5 (2014: 306)
– Nigeria 0 (2014: 6, 2015: 0)
Si nos no elimina Polio, den 10 aña nos lo por wak mas di 200,000 caso nobo cada aña.
End Polio Now Fun 5K Walk / Run
Aunke cu na Aruba nos no conoce caso di polio mas, door di e vacuna cu tur baby ta ricibi via Stichting Wit Gele Kruis, Rotary Club of Aruba, formando parti di un organisacion internacional, kier a conscientisa pueblo di Aruba tocante e malesa di polio. Na Aruba e ultimo caso cu a wordo registra di polio ta den añanan 60.
Rotary Club of Aruba ta organisa un End Polio Now Fun 5K Walk / Run riba diadomingo 19 di November 2017. Registration lo tuma lugar pa 4.30 pm y e caminata lo cuminsa pa 5:00 pm saliendo for di Fisherman’s Hut na Arashi. E ta di 5 kilometer y lo por cana of corre e ruta. Inscription pa participa ta Afl. 20.00 y lo tin un dri-fit shirt pa cada participante. Na final di e End Polio Now Fun 5K Walk / Run lo bai rifa diferente premionan atractivo pa e participantenan.
E evento End Polio Now Fun 5K Walk / Run ta wordo organisa pa Rotary Club of Aruba hunto cu su partners Rotaract Club of Aruba, Interact Club of Aruba y tambe Xavier University, School of Medicine.
Den curso di e dianan cu ta bin, Rotary lo sigui duna mas informacion na unda pa registra. Pa mas informacion tocante e End Polio Now Fun 5K Walk / Run bisihita nos Facebook page Rotary Club Aruba.
