Doño di e cacho cu a haya un boet for di polis pa laga e animal hopi largo cera den auto algun dia atras, a duna su banda di medaya. El a sigura cu e ta stima bestia y nunca lo haci algo cu ta causa daño na su cacho.
Ta trata aki Rosalinda van der Ham, kende a conta kico a pasa dia prome di januari ultimo. E ta nenga cu e cacho tabatin calor, manera a wordo bisa. Pa cuminsa Polar ta un mescla di cuater rasa: Labrador, Gold Retriever, Pitbull y Husky. E ultimo rasa aki ta un tipo di cacho cu mester di hopi ehercicio. P’esey e ta bay hike y pasa lama cu ne pa kima su energia.
Normalmente e ta bay hike, hiba e cacho cas pa despues bay cumpra cuminda. E dia ey sinembargo e cacho a lora den pisca morto na lama y e no por a hib’e cas di biaha. “E ta drumi den airco cu mi y mi no por hinc’e den camber di e forma ey. Mi a dicidi di bay cumpra cuminda cu ne.”
Despues cu el a paga, e Chines a bis’e cu tin hopi hende su dilanti. “Si mi tabata sa esey prome, mi lo a bay busca cuminda otro caminda. Pero mi a paga caba.”
E tabata para eyden ora cu un polis a cana drenta puntra di ken e auto ta. El a conta con el a spanta, pasobra el a kere cu nan a haci algo cu su cacho. Pero nan a splic’e cu e cacho ta cera den calor pa basta rato. “E cos ey no ta cuadra.”
El a mustra con e ta cana cu e boter y baki pa pone awo pa e animal. Ademas, hasta e cacho tin su seatbelt pa uza den auto y evita cu e ta yega cerca di stuur, causando un accidente. El a conta cu na Inglatera ta obliga pa cana cu un faha asina den auto.
El a mustra con e Polis a dun’e boet pa diferente punto y niun di nan ta cuadra. E glasnan no ta completamente cera y semper e ta cana cu e cacho su boter di awa.
Awo e lo bay corte pa splica hues cu e boetnan no ta cuadra.
