“Ken ta controla Departamento Recurso Humano (DRH)”, ta locual cu Rodney Solognier, presidente di SPA a cuestiona, relaciona cu tema di prestatiemanagement un biaha mas den publicidad. Ademas di introduccion di prestatiemanagement, e departamento aki ta papia di un academia cu meta pa logra motiva e forsa laboral.
Segun Solognier, DRH tin cu mira den su concepto, como cu e sistema actual di DRH mes ta masacra e miembronan di cuerpo policial cu a traha henter nan bida pa e pais aki. E ‘aprecio’ cu nan ta ricibi di DRH ta sea cambia fecha di nan landsbesluit (LB) of retrasa/wanta esaki aden pa varios luna largo, perhudicando e polis (trahado).
Ta papia di fayo barbaro di nan parti, pero ken ta controla DRH? Na ki momento ta haci un control riba nan ora ta tuma decision di retira trahado (nan) for di nan propio departamento?
A tuma nota cu a publica den algun medio di comunicacion riba e concepto, pa locual ta trata prestatiemanagement, cu esaki lo brinda e trahado publico un sistema cu ta sostene dialogo abierto y constructivo, pero ta mira lo contrario. E supuesto aprecio y progreso no ta algo cu ta mira cerca polis.
Referente di DRH su academy, si kier logra un forsa laboral mas fuerte, transparente y motiva, anto gobierno mester haya un bon splicacion cu poder di compra di cada trahado ta mara na esaki. Tin un demotivacion grandisimo cerca cada trahado publico mirando con atras nan a bay.
“Si realmente gobierno kier un aparato gubernamental mas fuerte, anto e ora ey nan mester stop di hinca ken cu ta den e aparato gubernamental como fabor politico”.
SPA ta di pensamento cu e ‘academy’ ta un otro forma pa distraccion di e realidad y tapa e echo cu nan no a yuda cu nan. E academy lo ta un argumento pa bisa cu nan a haci algo.
Mester tene na cuenta tambe cu tin circunstancia cu por presenta den cada persona su trayectoria laboral. Discrepancia/ diferencia di opinion como tambe iregularidad cu por tabata eroneo den un of otro forma cu ta pone e trahado publico den dificultad laboral, na e momento ey mester tin un departamento/persona neutral cu por intermedia den cualkier caso cu presenta.Ta sinti cu esaki no ta e caso, una bes cu trahado, den e caso aki, polis haya su mes enfrenta den un of otro dificultad laboral, e departamento ta haci esaki un calvario pa cualkier trahado y na un punto cu no tin scapatorio mas di yega na dialogo ni acuerdo laboral mas.
E prestatiemanagement no ta malo, pero si e ta den man robes e por costa hopi hende nan trabou.
