Minister di Husticia y Asuntonan Social a tene dos dia di reunion na tur warda di polis. A intercambia idea como tambe brinda informacion na e polisnan presente. Tambe tin atencion riba e incidentenan cu arma di candela. Ta trahando riba un concepto di ley pa aumenta castigo di tur loke tin di haber cu arma di candela.
Rocco Tjon, Minister di Husticia y Asuntonan Social, a indica cu e reunion tabata uno positivo. Diaranson a tene bishita na warda di San Nicolas y Santa Cruz, unda a intercambia idea y brinda informacion na e polisnan presente. Aki el a referi na e lider di districto como e personal cu tabata presente.
Awe a tene bishita na tanto warda di Noord como esun di Playa. E bishita aki tambe tabata positivo. Segun e mandatario, ta importante pa brinda informacion corecto y contesta pregunta, pero tambe pa scucha e ideanan y necesidad practico di e polisnan. Pa loke ta e palabracion haci cu korpsleider ta cu banda di e proceso regular cu entro otro di adkiri material, nan lo percura na un forma mas cortico riba e necesidad treci dilanti durante e bishita na un forma mas rapido pa adkiri e material.
Tin un aumento di mas o menos tres miyon florin pa e goederen en diensten pa Cuerpo Policial. El a indica cu tin espacio pa adkiri e materialnan aki. Otro siman nan lo sigui cu e tipo di reunionnan aki n’e cuater wardanan, pero e biaha aki cu tur departamento di recherche.
BULLETPROOF VEST
Na diferente ocasion a trata e topico di bulletproof vest y peticion pa adkiri esaki a bin di altocomisario di polis. Segun e mandatario, momento cu a haya e peticion aki, pa su persona tabata importante e opinion di sindicato di polis tra’i e escogencia. E sindicato ta para tras di esey y nan mes ta esun cu a scoge e bulletproof vest como e compania na Merca.
Tjon a indica cu a paga caba p’e vestnan y e compania a informa cu nan ta mand’e den tres cargamento. Na comienso di maart e prome shipment lo yega y despues e siguiente cargamentonan lo yega.
ARMA DI CANDELA
Ministerio di Husticia tin atencion riba e incidentenan criminal, manera e tiramento cu a tuma luga den fin di siman. Ta atende cu ne fo’i diferente angulo e parti legislativo. Ta trahando riba un concepto di ley pa presenta na Conseho di Minister pa aumenta castigo tur cos cu tin di haber cu arma di candela.
Pa mas lesa TREMPAN.COM.
