Diabierna anochi a sosode un accidente riba Watty Vos Boulevard. Ta trata di un Jeep Wrangler numera A-74025 y un Honda Civic numera A-64685. Rocco Tjon, lider di fraccion di MEP y casa di altocomisario di polis tabata tras di stuur di e Jeep.
Segun informacion ricibi, despues cu e accidente a tuma luga, a start un discucion formal entre e partidonan. Mirando cu tur dos tabata declara diferente version, a manda polis cu maximo urgencia pa atende cu un accidente chikito. E accidente a tuma luga net poco despues di e brug cu ta bay pa Paperclip rotonde riba Watty Vos Boulevard.
Polis di trafico a presenta pa documenta e accidente. A puntra Tjon si tur cos ta OK cu ne, el a declara na 24ora cu e no ta herida. No ta conoci si tabatin mas persona den e Jeep di Tjon, mirando cu e glas ta preto preto.
Rocco Tjon ta candidato #5 riba lista di partido MEP. Den eleccion di aña 2017 e tabata #8 riba lista y a logra no menos di 1213 voto riba su nomber. El a aspira e puesto di Minister di Husticia den e gobernacion aki, pero no tabata posibel debi cu a forma coalicion cu POR cu a haya e cartera ey. Tjon a bira lider di fraccion y awo a crece riba lista di e partido politico, aspirando un puesto ehecutivo den e siguiente gabinete.
