Ernst Mohammed no ta un persona desconoci den comunidad ya cu pa varios aña e tabata presidente di Camara di Comercio.
Pero loke hopi no sa, ta cu e ta un persona cu ta activo den deporte como referee di futbol y e ta un persona cu ta gusta pa e hubentud bay dilanti. Awo el a haya e oportunidad di dirigi e team di Riverplate U17 cual ta un oportunidad cu el a tuma cu man habri.
Mohamed a bisa cu e team falta algun hungado y e ta haci un yamada na esun cu ta interesa por yega veld, unda cu sigur cada hoben lo haya un oportunidad di demostra su capacidad. Na Riverplate nan no ta ‘build’ un team, pero un machine. Den un machine tur parti ta importante. El a splica cu esaki ta encera cu ora ta bezig ta train, ta coach con pa hunga, pa traha como team pa sali campeon.
Riverplate ta un team cu e ta sigui pa basta aña caba di cerca y e ta ripara cu e ta un club cu hopi potencial. Nan tin hopi aña di existencia y den pasado e tabata un club cu hopi mal nomber. Pero Mohamed a bisa cu el a ripara cu e club a logra di traha riba e disciplina di su hungadonan contrario na e añanan anterior. Mohamed a ripara cu e hobennan di Riverplate tin hopi interes. E no solamente kier build un team, ya cu esaki no ta bay di anochi pa mainta. E ta un proceso cu ta tuma su tempo. Ta importante pa e hobennan gusta loke nan ta haci.
