Parlamentario di Fraccion di MEP, Ricky Hoek a indica cu durante di e tratamento di e Ley di Presupuesto Supletorio (Voorjaarsnota) 2024, por a wak un biaha mas e disciplina y e seriedad di trabou cu Gabinete Wever-Croes II ta sigui realisa pa loke ta trata e maneho financiero di nos pais Aruba. Gabinete Wever-Croes II ta guiando e pais aki pa nos yega na un dignidad economico.
Kico kiermen dignidad economico? Dignidad economico ta e resultado di batayanan gana, bareranan cu a keda surpasa, y teritorio economico conkista. Esey ta e ‘mindset’ di liderazgo cu ta eleva un nacion economicamente a pesar di tur adversidad, por ehempel e pandemia di COVID-19, Hoek a expresa.
“Ora bo ta un lider y bo tin un gobierno cu tin un vision cla pa bo pais, bo ta wak con na diferente nivel ta wordo traha pa trece cambionan positivo pa e ciudadanonan. Asina bo ta wak con gobierno actual ta realisa su vision na e siguiente nivelnan, cu ta entre otro: vision personal, vision relacional, vision organisacional, vision nacional”, e parlamentario a agrega.
Ehempel concreto
Un di e ehempelnan concreto cu bo ta wak, ta con e ministernan hunto cu e profesionalnan di nan respectivo departamento ta demostra di ta sigui brinda profesionalismo, trabou di calidad y transparencia. Specificamente durante reunion publico dia diamars 25 junipor wak e ‘voorjaarsnota’ 2024, cu ta e actualisacion di cifranan (entrada) y maneho (unda lo bay inverti) e presupuesto cu Parlamento a aproba na december 2023.
Cu e actualisacion aki, ta logra dos meta:uno, cu parlamento por haci uzo di su ‘budgetrecht’ na tempo pa por controla y aproba e presupuesto di pais Aruba. Di dos meta ta cu pueblo tambe ta haya un bista di con nos economia ta creciendo. Pero principalmente e ciudadano ta haya sa unda gobierno ta inverti den algun proyecto specifico. Loke ta mas miho ainda, ta cu gobierno ta inverti e extra entradanan den nos ambtenaarnan, pensionadonan, fundacionnan, mucha y hobennan y personanan cu incapacidad.
E realidad ta cu en berdad tin ciudadanonan cu tin un poder di compra abou riba nos isla. Pero realidad ta tambe cu Gabinete Wever-Croes II ta consciente di e situacion aki y ta haci su maximo esfuerso pa tur hende tin un miho entrada economico posibel. Un dignidad economico pa tur ciudadano, Parlamentario Ricky Hoek a declara.
