Durante e dianan di fiesta un of mas medio di comunicacion a indica a base di rumornan cu lo a comete fayo den e proceso di duna 5 empleado di Guarda Nos Costa prohibicion di entrada na trabou. “Al contrario, e investigacion ta avansando. Y aunke tabatin algun dia liber memey, nos ta sigui traha y investiga”, asina Richard Kramers, encarga cu e maneho diario di Guarda Nos Costa, a duna di conoce. E ta referi na un investigacion andando relaciona c’un persona sin status legal cu a logra huy na un forma hopi misterioso for di e centro di reclusion.
Tabata dia 28 di maart 2021 cu un ilegal cu a yega via boto a huy for di e facilidad di Guarda Nos Costa. E ilegal no tabata den su cel ora dia a habri y ta te mainta cu algun otro ilegal a notifica di su desaparicion. Mirando cu no por a conclui con e persona a logra huy, sea ta su so of cu ayudo di paden, a dicidi di start un investigacion.
Pa por duna e investigadonan e espacio necesario, a duna e empleadonan envolvi durante e warda cu e ilegal a huy un prohibicion di entrada na trabou a base di e Ordenansa cu ta regarda ambtenaar (“LMA”).
“Esaki ta un practica masha normal”, Richard Kramers a splica. No ta prome biaha c’un ilegal ta huy, pero e huymento di dia 28 di maart 2021 tabata diferente y e circunstancianan a duna sospecho cu algo no ta klop, pa cual motibo a start cu un investigacion, pa asina aclaria y pa kita tur duda.
Si un persona no ta di acuerdo cu un decision asina semper e por acudi na Corte a base di e propio LMA. Ley y hurisprudencia ta mustra cu Land Aruba tin discrecion como doño di trabou pa impone un prohibicion di entrada na pia di trabou di minimo 6 siman den casonan similar, pues e persona of personanan cu a acudi na e medionan di comunicacion no conoce of ta ignora e procedura normal y ta purba trece confusion innecesario. En todo caso lo sigui cu e investigacion pa haya sa kico a pasa, pasobra e circunstancianan bou cual e persona a huy no ta normal.
