Hopi biaha ta comunidad mes ta yuda su mes pa resolve su caso. Propietario di un Kayak a pone denuncia na momento cu un persona lo a drenta su cura di cas y bay cu esaki.
E ladronicia a tuma luga den luna di februari y for di e tempo ey nan ta masha atento riba caya como tambe riba red social pa cualkier indicacion di benta di e kayak special aki.
Dicho echo! No por a kere su wowo ora a tuma nota, riba vraag en aanbod, pa benta di un kayak y mesora a reconoce su pertenencia. Estilo di e kayak no ta comun y ta pa e motibo aki mes ta reconoc’e inmediatamente.
E propietario a pretende di ta un cumprado interesa, a palabra un orario y sitio pa efectua e compra. Mientrastanto a pidi asistencia di polis pa asina compañ’e pa recupera su pertenencia. E encuentro lo mester a tuma luga na un cas na Rooi Afo.
Na yegada, e propietario a confirma cu enberdad esey tabata su kayak y a laga autoridad tuma over. A confisca e kayak como tambe a pasa na detencion di e sospechoso, relaciona cu e benta di articulo horta. Ta keda den man di recherche pa soluciona e caso.
