Recientemente a tuma luga un tipo di “hostile takeover” na e fundacion cu ta maneha e cas pa cuido di mucha, Stichting Kinderhuis Imeldahof Aruba. Minister Rocco Tjon a yama e directiva aden y a informa nan cu e ta desea di mira un cambio drastico. El a haci un apelacion riba e directiva pa habri espacio pa otro miembro por drenta y tuma maneho di e fundacion over. E directiva a evalua, a papia cu nan abogado y na final a dicidi pa honra peticion di e mandatario.
E directiva saliente tabata consisti di Wernher Dijkhoff como presidente, Marvel Bermudez, un experto cu a traha henter su bida pa United Nations, Luty Martinez, un onderwijskundige cu un PhD cu a ricibi condecoracion Real pa su bon trabao y Johan Vrieswijk, un otro experto cu a dedica hopi aña di su bida tambe na Scouting Aruba.
E motibo exacto dicon e mandatario a opta pa mete den maneho di e fundacion, no ta conoci. Legalmente Gobierno di Aruba no tin nada di bisa den maneho di e fundacion, mas cu nan ta e unico cu ta subsidia e operacion y salario di e trahadonan. E directiva a evalua, pa bay un guera cu gobierno cu lo por afecta e trahadonan y hasta e clientenan eyden, cu ta miho pa cumpli cu deseo di e mandatario. Djis cu e forma con e asuntonan a bay no tabata di aprecia. Hopi di e miembronan di directiva a traha pa hopi aña y nunca a spera di haya “stank voor dank”.
Na nan luga a drenta un direcitva nobo, proponi door di e propio Minister di Husticia y Asuntonan Social. Ta trata aki di Juri Nicolaas como presidente; Abigael Emmanuel como secretario; Myron Koolman como tesorero; Adrienne Fraser como miembro y e presidente saliente, Wernher Dijkhoff como miembro. Parce cu e intencion ta pa e presidente saliente por guia e presidente nobo y despues di algun tempo mester sali tambe pa por traha caminda pa otro miembro nobo.
Pa e relato completo, lesa e edicion di awe di TREMPAN.
