Pa algun tempo caba Hungateca ta na Aruba, unda cu nan ta organisa diferente actividad, ta stimula e binimento hunto.
Shurman Milliard, trahado social, a indica cu Hungateca ta un caminda unda cu e mayornan por haya informacion y haci diferente actividad pa mayor y yiu. Ta actividadnan cu nan ta ripiti na varios ocasion y esey ta les di cushinamento. Esey ta e momento cu tata y mama por participa cu e siñamento di nan yiu. Pa esaki nan ta invita diferente coki, diferente persona cu ta cushina pa duna informacion tocante con pa cushina cu bo yiu.
E biaha aki nan tabata tin un señora cu a participa y algo cu Hungateca ta haya hopi importante ta pa e ta algo saludabel y asina Hungateca ta promove esaki tambe. E señora aki ta nada mas y nada menos cu Primera Dama di nos pais, Hanneke Boekhoudt.
Hanneke a conta cu e no ta un specialista den cushinamento, e no ta un coki, pero e ta un mama cu ta gusta cushina. Cu tempo el a hasta colecciona hopi receta. Su inspiracion e ta sac’e for di e luganan cu menos bo por pensa, kisas un hende ta bin bishit’e, den combersacion ta intercambia receta of un restaurant unda cu por come algo dushi, esey ta su inspiracion. Y di tur e recetanan el a skirbi un ‘cookbook’. Den su buki e ta comparti receta di tur rond mundo.
Na unda Hungateca ta situa nan no tin cushina, pa cual, riba invitacion di Hungateca el a bin e biaha aki pa duna un tayer. Y door cu, sin un cushina, e posibildiad ta limita pero esaki no a strob’e di prepara algo, cu tabata un salada di tuna.
Esaki ta algo hopi simpel pa traha y ta algo cu un mucha por capta lihe cu despues e mes, hunto cu e yudansa di su mayornan, lo por traha na cas.
