Entrante dia 1 di juni 2024, e compania Nagico Dutch Caribbean N.V. a bende nan compania Nagico Road & Claims Services B.V. (NRCS) na 2Fast4U Towing Service di Juan de la Cruz. Un ke otro tin di haber cu ley di competencia. A kita e compania di Nagico pero a haci 2Fast4U mas grandi awo y a crece riba nan competencia.
Cuanto Juan de la Cruz a paga pa cumpra e mercado di road service na Aruba no ta conoci. E tabatin un compania hopi aña caba cu ta ofrece servicio di takelwagen na Aruba. E tabatin shete trahado y cinco takelwagen. Cu e fusion, el a tuma tur 14 trahado di Nagico Road Service, a tuma tres takelwagen mas y cinco auto (van) di servicio. Di e forma aki, di e anochi di 31 di mei pa 1 di juni, el a bira e compania mas grandi di servicio di takelwagen y specialmente di road service riba nos isla.
2Fast4U ta domina e mercado awo
Mester menciona cu tur e añanan, 2Fast4U tabata conoci den e mercado di servicio di takelwagen pero desde e luna aki a bira e gigante den road service tambe, esta pa atende cu cliente na luga di accidente. Banco Central ni Aruba Fair Trade Authority (AFTA) no tin problema cu e mesun compania di road service tin takelwagen tambe. Si nan tin problema cu e mesun compania di seguro ta doño di e compania di road service cu ta atende cu accidente. Ta mira esaki como competencia inhusto y a forsa pa bende e compania.
Trahado contento
“Pa nos ta bon”, asina por lo menos un di e 14 trahadonan di Nagico Road Service a expresa. Nan ta mira cu awo, cu e fusion aki, nan tin mas chens di sigui crece profesionalmente. Nan doño di trabou nobo, 2Fast4U a tuma tur trahado, sin mishi cu nan salario, beneficio y ni nan añanan di trabou. Pues e contract individual di tur trahado a keda intacto, djis cu awo nan ta raporta na un otro hefe.
No tin exclusividad mas
“Awo nos lo por competi miho den e mercado. Antes nos tabata limita na sirbi clientenan di Nagico pero cu e adkisicion aki, ta habri caminda pa nos por sirbi cliente di tur compania di seguro”, segun un empleado cu a prefera di keda anonimo ainda. E ta ta convenci cu no tin competencia mas pa nan, cu tur nan experiencia, conocemento di ley di trafico, mas ekipo cu nan tin awo y a habilidad di por sirbi como un “on stop shop” ora di un accidente.
Mas ekipo = mas servicio
Tambe awo, ora di ofrece servicio di road service, pues ora bo cera yabi den auto, ora bateria di e auto baha, ora haya flat tire, ora bo pega bo auto den santo blanco of ora bo auto daña y bo mester un takelwagen, e capacidad a bira mas grandi. No tin ningun otro compania awo cu tanto ekipo y personal disponibel pa brinda servicio rapido y eficiente.
AFTA ta envolvi
Di acuerdo cu Aruba Fair Trade Authority (AFTA), nan a haya “melding” di 2 Fast For U Company VBA (2Fast4U) na april ultimo, cu nan ta cla pa cumpra tur accion di e compania Nagico Road & Claims Services B.V. (NRCS), cu ta pertenece na Nagico Dutch Caribbean N.V. Y como cu por papia aki di “concentracion” di poder den mercado, awendia ley ta obliga pa informa AFTA prome cu cumpra. Esaki ta ancra den ley, articulo 3.1, inciso 1, di e Mededingingsverordening.
E mercado
Ambos compania ta den e mesun tipo di negoshi, pero Banco Central no ta na fabor pa Nagico tin su mesun road service y a obliga nan pa deshaci di dicho compania. 2Fast4U ta ofrece servicio di takelwagen y road service ora auto daña riba caminda of tin mala suerte cu e auto. Nan ta haci esaki pa hopi aña caba na cliente individual of na negoshinan.
Nagico Road & Claims Services B.V. (NRCS) ta forma parti di Nagico Dutch Caribbean N.V. y ta ofrece servicio di registracion di accidente, takelwagen y road service exclusivamente na clientenan di Nagico Aruba.
Awor cu e fusion di NRCS, awo 2Fast4U ta haya e oportunidad pa drenta e mercado di registracion di accidente y asina amplia su servicio. Cu esaki 2Fast4U awor por ofrece e mesun servicio aki na otro agencianan di seguro y asina conkista un mercado mucho mas grandi.
E autoridad di AFTA
Aruba Fair Trade Authority (AFTA) ta aplica y tene su mes na e ley conoci como e “ Mededingingsverordening”. Aunke cu e ley no ta duna AFTA ningun autoridad pa blokia un fusion, compra of ‘joint venture’, toch e ta rekeri pa informa e autoridad prome cu cualkier ccompra, joint venture of fusionnan grandi. Awor AFTA lo mester husga si e transaccion cu 2Fast4U a presenta na nan, cu si e ta permiti di acuerdo cu articulo 3.1 di e “ Mededingingsverordening”. Un di e rekisitonan ta cu mester publica e compra den Landacourant, loke cu nan a haci tambe. Pues bisando esaki, ainda AFTA por expresa su mes y wanta e fusion, si acaso sali na cla cu por papia di concentracion di poder den e mercado.
Despues di hopi aña
Echo ta cu Nagico, un compania di seguro cu base na Sint Maarten, a drenta mercado Rubiano prome via un broker, na aña 2004. Nan a crece rapidamente, specialmente despues cu na aña 2007 nan tabata e prome y unico compania di seguro cu nan mesun servicio di Road Service. Nagico Insurances tin dos oficina na Aruba, un na Savaneta y otro den Caya Milio Croes na Dakota.
Ta keda ironico, cu for di aña 2007…cu ta te na aña 2024 cu e road service a bira un problema. Pues pa 17 aña e tabata OK pero awo no por mas.
A funda Nagico Insurances na aña 1982 na Sint Maarten y a crece y penetra den mas cu 20 mercado. Nan ta un di e companianan di seguro mas grandi den Caribe Hulandes cu mas di US$ 150 miyon na prima y ta ofrece un di e miho seguro di catastrofe den region. Internacionalmente AM Best a “rate” Nagico como un compania solido. Nagico Insurances a sigui crece adkiriendo British American Insurance Company y awor ta ofrece seguro di bida y medico via e compania Nagico Life.
