Su Mahestad Rey Willem-Alexander y Reina Máxima cumpli binti aña casa awe. Riba diasabra 2 di februari 2002 nan a drenta den enlace matrimonial na Amsterdam. S.M. Willem-Alexander ta tata di tres yiu, Prinses Catharina-Amalia, Prinses Alexia y Prinses Ariane.
Ta riba 21 di mei 2001 ora cu gobierno Hulandes a propone un rijkswet na Staten-General pidiendo permiso pa Prins Willem-Alexander casa cu Máxima Zorreguieta. A trata e peticion den tres parlamento di Reino. Den Parlamento di Antiyas, Parlamento di Aruba y Staten-Generaal. E parlamentarionan di tur tres parlamento a vota y a duna permiso pa Prins Willem-Alexander casa cu Máxima Zorreguieta, naci na Argentina.
Potret: © RVD – Jeroen van der Meyde
Pa bira parti di Cas Real, ta obligatorio pa ta di nacionalidad Hulandes, di cual Reina Máxima e tempo ey tabatin paspoort di Argentina. Pues, a hay’e obliga di laga su nacionalidad di origen cay pa por forma parti di Cas Real. Prins Willem-Alexander y Máxima a topa otro pa prome biaha na aña 1999 den un fiesta yama La Feria de Abril.
Máxima tabata invita pero como fotografo. Prins Willem-Alexander no a pens’e dos biaha y a invita Máxima pa baila cu ne, despues di e baile, Máxima a bisa su amiganan cu e mucha homber Hulandes ey ta baila malo, e no tin mucho movecion cu su sintura.
E tempo ey, Máxima tabata traha pa un banco Aleman na New York, di cual cada bes Prins Willem-Alexander tabata biaha pa Merca pa topa cu ne. E ceremonia matrimonial a tuma luga den Nieuwe Kerk na Dam Amsterdam, tabatin seisshen persona invita.
