Diahuebs 24 di maart 2022, Aruba Trade and Instustry Association (ATIA) a tene su reunion general di miembresia bek na cas den e “ATIA Building”.
Prome cu e parti oficial, Anthony Croes, Director di Plus Accountants, a duna un presentacion interesante riba e tema di “Operational effects of BTW”. Anthony Croes a presenta en breve kico lo por ta e efectonan di implementacion di BTW den e sistemanan di administracion y operacion pa compania. Mester conclui cu implementacion di un sistema di BTW lo tin su efectonan pero ainda no tin hopi informacion pues tin hopi speculacion. E presentacion a activa un discusion hopi dinamico y interesante entre esunnan presente. Mas den futuro ATIA lo organisa un Town Hall pa tur su miembronan ora tin mas informacion concreto riba e tema di BTW.
Durante e reunion a presenta e resultadonan di e aña anterior y e enfoke pa 2022 y alabes a eligi e miembronan di e hunta di directiva pa aña 2022 – 2023.
Durante 2021, ATIA su enfoke tabata riba recuperacion di Aruba su ecomonia y a forma parti di e crisis team pa cu e recuperacion aki. ATIA a participa den diferente stakeholders meetings pa cu “landspakket” ribe e temanan di ley laboral, clima di inversion den nos economia (“red tape”) y awo den 2022 tambe e reforma fiscal.
Tambe ATIA a sigui enfoka durante e aña riba desaroyo di e habilidadnan y expertisio di su miembronan y nan empleadonan por medio di diferente workshops, sesionan di informacion y eventonan pa engrandese e network di miembronan di ATIA.
E director a presenta e mix di ATIA su miembresia enfatisando cu ATIA ta representa no solamente tur sector di Aruba su economia pero tambe e mayoria di su miembersia (72%) ta companianan cu menos di 39 empleado, cu lo por wordo considera un “small to medium entity” (SME).
Pa aña 2022 – 2023, e hunta di directiva mester a despidi di 2 miembro di e hunta, Donald de Veer y Jurgen Benschop. ATIA ta gradici Don y Jurgen pa nan aporte valioso como miembro di junta di ATIA. E presidente, vice-presidente, tesorero y secretaria nobonan, lo wordo eligi durante e prome reunion di e hunta durante e luna di april y ATIA lo anuncia esei ora nan a wordo elegi.
E hunta di directiva di ATIA pa 2022 – 2023 ta consisti di: Frank Snijders, Tristan Every, Tito de Cuba, Ronnie van Trigt, Tisa LaSorte, Roland Croes, Mattijs Bijen, Gina Habibe y Andrew Harms.
E reunion a culmina cu un presentacion di e Director Henriquez cu a presenta vision y strategia di ATIA pa e aña venidero y futuro cu e la presenta como e “4 pilarnan pa ATIA su exito”.
