Den un conferencia di prensa diahuebs mainta Procurador General Alexander van Dam a papia di e detención di e sospechoso J.Ch. den caso FIST, cu ta e asesinato cruel di e mucha muhe Sarahi Sierra na de Vuyst riba 3 di november, 2017.
Apesar cu tin detencion di un persona, PG a bisa ciudadanonan cu cualkier persona cu por tin informacion di e dia aki, auto cu nan a mira pasa, personanan canando, pa suministra Cuerpo Policial cu e informacion aki.
Aworaki ta bay cuminsa na interogacion di e sospechoso aki, ta bay confronte cu tur e materialnan confisca durante e investigacion. Esey ta e motibo tambe cu te ainda no por bisa kico lo bay bira e acusacion contra esun cu finalmente lo wordo hiba dilanti mesa berde. E ta depende no solamente di e crimen y con el a wordo cometi, pero tambe kico e sospechoso ta bay declara aworaki na Recherchenan y Hues Comisario. Den e interogacion ta bay bini dilanti cu e profiel di DNA cu a recoge na e sitio y di cual su resultadonan a yega Aruba ta cuadra cu e DNA profiel di e homber di 46 aña cu a wordo deteni diaranson atardi. Ta parce cu DNA a wordo duna boluntariamente den e caso aki door di e sospechosonan.
No por duna un informacion di tur loke a wordo haya na e sitio, pasobra e sospechoso e ora lo por bay duna un splicacion di pakico algo di dje tabata eynan of no.Pesey tambe a cera den isolacion, pa e no tin ningun contacto.
E detencion di e sospechoso aki a bini diaranson den oranan di atardi y el a bini cu sorpresa pasobra e persona deteni ta un conoci di famia.
