Diasabra mainta ta cuminsa resa Santo Rosario na Kapel di Alto Vista, mientras na kapel Centro Curason di Maria (Blue Army Center) na San Nicolas pa 7:00 am ta cuminsa Santa Misa.
Prome cu Santo Misa ta resa Santo Rosario pa 6:15 am Misterio Gososo, despues ta sigui cu Salve Regina. Ta invita tur devoto y fiel di Mama Maria pa asisti na e Santa Rosario prome cu Santa Misa. Mama Maria ta entercede pa nos na nos Tata Celestial. Tur fiel ta bin resa e Santo Rosario pa bienestar di henter comunidad di Aruba, Papa Francisco, Obispo Luis Secco, tur sacerdote, diacono y laico cu ta hiba e bon noticia pa e pueblo di Dios.
Pa nos gobernantenan y tur cu ta carga e responsabilidad pa nos pais Aruba. Pa e enfermonan den exterior cu a bay busca nan salud. Cu pronto nan lo regresa na Aruba pa sigui gosa di un bon salud dentro di nan famia.
Luna di september ta dedica pa PAZ na mundo. Dia 13 di september Maria ta spierta e muchanan pa di dos bes, specialmente pa resa rosario pa paz.
Ban hinca rudia busca refugio na nos Mama Celestial. E ta guia nos riba e Caminda cu Dios ta, ey nos tur kier biba. Cu Mama Maria den nos curason, nos Mama stima, compaña nos den e caminda di Señor.
Ban hunto resa pa nos hogar y nos isla Aruba y henter mundo, pa tin pas y comprension un pa otro. Den nos oracionnan resa pa Ucrania y Rusia cu nan por yega na e pas desea.
