Rennox Calmes, lider di fraccion Trabou pa Kòrsou ((TPK), tabatin palabranan fuerte contra Hulanda durante e reunion di parlamentonan di Reino (IPKO) riba e tema di “ondermijnende criminaliteit” (labamento di placa, droga, etc.). Hulanda ta papia di e tema aki, lubidando cu tur cos ta cuminsa na Hulanda mes.
Calmes a tuma nota durante cu a papia di e tema di “ondermijnende criminaliteit” el a sinti cu e cos ta masha simpel. “Henter e asunto aki den Reino ta bini door di Hulanda, e ta tuma luga pa medio di cocaina (droga) y haf di Rotterdam ta esun cu ta hacie lucrativo pa tur pais. Incluso nan mes.”
El a duna e ehempel cu na aña 2021 a confisca 70 mil kilo di cocaina y na aña 2022 e tabata 73 mil kilo. Y esaki a resulta cu ta 74% mas cu na aña 2020. Un subida drastico. Pero sigur ta cu tin cantidad grandi cu no a confisca, cu tambe ta importante.
E ta corda cu na aña 2000 Hulanda a pone presion pa pone 100% di control na aeropuerto, pa e hendenan cu bolita no bay Hulanda. Awo 24 aña despues a manda barco bin controla den Caribe pa barconan cu transporta droga cu supuestamente mester bay Hulanda. Pero nan mes no ta logrando. P’esey e kier sa ki tempo ta pone 100% di control na haf di Rotterdam. Pasobra tur esaki ta causa criminalidad pa e islanan.
E ta haya cu e islanan mester mustra Hulanda cu nan tampoco ta cumpliendo manera a kere cu e islanan por y mester a haci. Hulanda semper ta trata di mustra cu nan ta superior y sa miho. Pero awo a keda demostra cu nan tampoco no por combati e tipo di criminalidad menciona.
Ta papia tambe di traha hunto, pero no mester lubida cu no por cambia e cultura Hulandes, cu nan pensamento cu tur e islanan aki banda ta di nan. Y ora cu nan ta papia di traha hunto, miho pidi pa pone preto riba blanco. E no a duna oido ora cu a papia di traha hunto, pasobra semper nan ta trata e islanan inferior y ta algo cu e lo no acepta.
Den plataforma di IPKO ta partnernan igual y si kier traha hunto, mester mustra esey tambe. Ta atende cosnan pafo di cas, mandando placa pa Ucrania, pero pa debe di COVID ta pone condicionnan pisa. Hulanda su interes pa traha hunto ta pa kita bista cu nan mes ta fayando y pa despues bisa cu ta e islanan no ta cumpli.
