Diaranson mainta, sindicato TOPA a ricibi un yamada di e trahadonan di KIA, relaciona cu informacion pa loke ta nan bevordering, cu tin mas di 3 aña pega.
Rene Bernabela, lider di sindicato TOPA, a bisa cu e ‘verkorte plaatsing procedure’ na KIA ta tumando luga. Anteriormente nan tabata tin varios reunion cu Omaira Lares, director di Departamento cu Recursonan Humano (DHR), cu tabata bayendo den bon direccion. A palabra cu e reunion lo a sigui awe mainta, pero diripiente diamars atardi laat nan ta haya un yamada for di e director di Departamento di Recurso Humano (DHR) cu ta cancela e reunion.
Motibo di e cancelacion, segun DHR ta cu nan no a keda cla ainda ya cu nan falta algun detaye pa loke ta e tema aki. Nan ta prefera di keda cla pa asina ora cu e reunion tuma luga, tur cos ta na ordo.
Mas aleu, Bernabela a bisa, cu nan a transmiti e preocupacion di e trahadonan di KIA na DHR. varios bevordering ta pega for di basta tempo caba. Sindicato TOPA tin como tres aña ta trahando riba e puntonan aki. nan kier yega na un solucion mas pronto posibel pa un desaroyo cu tin basta tempo andando. Nan a bin compronde cu e problema no ta sinta na Minister di Husticia, pero ta mas sinta na DHR. P’esey su persona a tuma contacto cu Lares di DHR pa haya sa precisamente e pakico a cancela e reunion.
TOPA a propone na Lares pa sigui di biaha cu e reunion, ya cu e trahadonan no ta contento cu e cancelacion y cu no a duna fecha pa sigui cu e reunion. Pero mas laat mainta nan a ricibi informacion for di Minister di Husticia cu e reunion lo sigui mañan, diahuebs pa 2:00 pm na e Opleidingschool di KIA, situa na Balashi.
