Un di e facilidadnan cu un comision internacional a controla aña pasa tabata e Centro di Detencion di migracion na Dakota. Aunke cu e stranheronan no tabatin mucho comentario negativo, ni riba e personal cu tabata atende cu nan, pero si riba un hefe cu tin caracteristica racista. Pa colmo e propio miembronan di e comision durante bishita n’e facilidad aki a scucha comentario racista for di boca di e funcionario aki di un posicion di supervision.
Manera menciona, e staf a ricibi comentario di abuso verbal, incluso menasa y bullying, como tambe remarke racista y provocativo cu a bin di un funcionario halto den mando. Pa colmo e mesun miembronan di e comision a haya nan mes ta scucha comentario racista dirigi contra un di e miembronan di e delegacion.
E hendenan cu ta trata den e centronan di detencion asina aki mester ta debidamente entrena no solamente pa atende cu e personanan stranhero pero reconoce señal di stress y con pa tuma accion necesario. Gobierno a informa e comision cu a planea diferente curso educativo pa henter e staff trahando n’e centronan aki.
Tambe a conseha pa selcciona e funcionarionan halto trahando n’e centronan di forma cuidadoso y provee entrenamento pa haci nan trabou di un forma profesional, cu un bon comunicacion y sa con pa atende cu e personanan di diferente tipo di cultura. Aunke e facilidad nobo ta adecua, el a presenta e mesun problema cu n’e wardanan di polis. Esta ora cu e hendenan baña, e camber ta inunda cu awa.
E material mes di e cambernan ta pober, esta container cu tin poco ventilacion y no ta adecuado pa acomoda hende. A apela na Gobierno di Aruba pa stop di uza e containernan pa acomoda e stranheronan indocumenta inmediatamente.
Tambe a pidi pa informa e comision di e facilidad den cual detenidonan indocumenta ta acomoda den futuro. Gobierno a cumpli tambe pasobra a informa e comision na juli cu a saca e containernan for di uzo y a traslada e personanan aki a un edificio recientemente construi n’e facilidad na Dakota.
Tabatin comentario tambe riba e regimen durante detencion. Dos of tres biaha pa dia tin acceso na aire fresco durante 30 minuut. Pa resto di dia ta pasa cera den nan camber den e containernan, cu nada pa haci durante simannan of lunanan largo. Esaki tabata inaceptabel. Nan por ta cera cu restriccion limita y un regimen varia di actividad. Nan mester por move libremente den e centro di detencion. Mas hopi nan keda eyden, mas actividad nan mester tin pa participa den dje. Incluyendo un luga pa haci oracion.
Tin un desaroyo positivo si den e area aki unda a bin cu un cambio cu den 72 ora di tempo e persona indocumenta mester presenta dilanti un hues. Mas ainda, e hues por ordena libertad di un persona riba su peticion, si e ta hay’e necesario. A pidi pa introduci si un tempo maximo cu por mantene e hendenan aki deteni pa nan expulsion. Den e Ordenansa Policial no tin nada specifica di esaki. Nan haya un copia traduci di e decisionnan tuma relaciona cu nan detencion y expulsion, incluyendo kico ta e proceduranan y deadline pa apelacion riba e decisionnan ey.
A constata cu tur formulacion di nan derecho ta solamente na Hulandes. Tur detenido mester haya esaki den e idioma cu nan ta compronde. Si ta necesario, mester uza un traductor. Incluso pa splica nan e reglanan di e facilidad eynan. A haya straño tambe cu e acceso di e personanan aki na un abogado ta limita pa dialuna, diaranson y diabierna. Ademas no tin un provision cu e personanan aki tin acceso na asistencia legal gratis pa esunnan cu no por paga un abogado.
