Den un publicacion di Follow the Money tocante e investigacion di e beach di Chogogo Resort Bonaire, ta cita Ter Steege: “Si bin un empresario rico, di biaha ta hala e reglanan di naturalesa y medio ambiente un banda.” Esaki sigur a bin di sorpresa den e circulo hudicial. “Como Ministerio Publico BES nos ta distancia nos mes di e declaracionnan di Ter Steege”, e vocero di Ministerio Publico BES, Roderick Gouverneur a bisa.
RAPPORT
Remarcabel ta cu pa Ter Steege nunca tabata tin motibo pa investiga e practicanan cu e ta denuncia. Tocante e maneho di OM, vocero Gouverneur a bisa: “ Den caso cu tin indicacion concreto di cu a viola un of otro ley, Ministerio Publico, en principio lo haci un investigacion. E investigacion cu actualmente ta tumando luga relaciona cu e creacion di un beach artificial dilanti Chogogo Beach and Dive Resort, ta un ehempel. “
Na 2020, Ter Steege a bandona Boneiro p’e bay establece su mes na Aruba unda cu actualmente e ta fungi como Procurador General. Ora cu a puntr’e riba su declaracion di “empresarionan rico pa cual ta ignora e reglanan di medio ambiente y naturalesa “ e ta haci referencia n’e rapport di Raad voor de Rechtshandhaving di 2019. “Den e rapport ey ta aborda specificamente e falta di control administrativo. Den e entrevista cu Follow the Money mi a referi na esaki.”
PROCESVERBAAL
Riba e pregunta dicon e, den su funcion como fiscal general nunca el a cuminsa un investigacion riba e posibel konkelmente di e reglanan di naturalesa y medio ambiente, Ter Steege a bisa: “Como fiscal general mi tabata di opinion cu ora ta trata di e aplicacion di e leynan di naturalesa y medio ambiente e uzo di derecho penal t’e ultimo recurso. Mester por tin un indicacion claro di un echo castigabel. Esey no tabata e caso na 2019.”
Den e mesun rapport na cual e ex-fiscal general ta referi, por lesa tambe cu e Directie Toezicht en Handhaving na Boneiro, e tempo ey, no tabata manda e supuesto infraccionnan pa Ministerio Publico ya cu no tabata “haci nada cu nan toch.”
Por ultimo, mr. Ter Steege no ta contesta e pregunta di kico ta su pensamento riba e echo cu OM BES a tuma distancia publicamente di su declaracionnan. “Pa cualkier otro pregunta, boso por tuma contacto cu OM BES,” el a finalisa bisando.
Fuente: https://dossierkoninkrijksrelaties.nl/
