E analista y politico Armand Hessels den un comentario duna ta papia riba e reformanan cu e ta haya necesario pa parlamento
Su analisis ta bisa lo siguiente:
E organo mas halto -riba papel- di Aruba ta e causa principal cu mal gobernacion structural di parti di gobierno consecutivo por a tuma luga sin ningun strobamento. Semper tawatin parlamento manso cu mas bien a funciona como complice di gobierno, entre otro dor di legitima tur iniciativa (incluso esnan dudoso) di gobernante. Pero esaki ta, specialmente den un comunidad chikito manera Aruba, practicamente inevitabel: gobernante y nan ‘controlado’ ta sali for di mesun partido cu en realidad ta determina maneho di e pais. Den practica ta trata di conflicto di interes institutionalisa cu ta enfoca mas bien riba interes personal y di partido.
Di interes di partido pa interes general
Lo anterior ta nifica cu tanten cu sigui mantene e sistema di partido politico como tal, ciudadano mes lo mester defende nan propio interes. Esey ta encera entre otro cu finanza publico mester ta na ordo locual ta permiti cu por paga e salario di empleado publico apto y dedica sin problema; cu e diferente departamentonan di gobierno lo funciona como debe ser; cu e pensionado lo mantene nan balor; cu lo reparti e medionan di pais Aruba na un manera husto; cu pueblo lo biba den harmonia cu otro, cu naturalesa y medio ambiente mientras cu comunidad lo desaroya di un manera sostenibel. En realidad e ‘propio interes’ aki di tur ciudadano ta interes general. Por realisa esaki solamente si hiba e ‘compas moral’ di ciudadano y sector comercial na un nivel mas halto den combinacion cu un apelacion urgente riba nan sentido di co-responsabilidad pa realisa bon gobernacion.
Escala chikito positivo
Semper ta menciona e ‘liñanan cortico’ entre gobernante y ciudadano cu por hiba na patronahe politico y corupcion como caracteristica negativo di nos escala chikito. Pero di otro banda e escala chikito por ofrece bentaha tambe. Na Aruba en general ta existi bon relacion entre e diferente gruponan social. Esaki ta un base importante pa bon comunicacion (efectivo). Mester haci bon uzo di esaki, pero awor na interes general. E intencion ta pa reuni representante di mucho mas grupo di interes pa colabora na diseña maneho cu ta cumbini henter Aruba. Den esey ta tene cuenta cu e interesnan di tur grupo. Den liña grandi eseynan ta gremio sindical y comercial, NGO’s, esnan di edad avansa y hoben (e.o. millenials). Asina cada ciudadano ta representa segun su ‘funcion’ den comunidad. Riba dje cada ciudadano tambe tin un representacion segun su domicilio. Si cada un di e cinco gruponan di interes mas cinco districto ta delega dos representante, lo compila un parlamento di 20 miembro. Un presidente independiente cu experticio di maneha reunion lo completa e cantidad cu tin fiha actualmente.
Criteria di seleccion
Pa motibo di e retonan grandi riba tereno financiero y social-economico, ademas di e necesidad pa trata nan na un manera eficiente y efectivo dentro di e cuadronan huridico, cada grupo di interes ta delega un representante cu experticio financiero-economico y un cu experticio huridico. Esaki so ya caba ta rekeri bastante capacidad di deliberacion di tur grupo di interes. Pasobra no ta nada facil pa por ehempel e grupo di sindicato (cu posibel contradiccion y conflicto interno) yega na un acuerdo pa ken lo representa nan tur. Por soluciona esaki ‘facilmente’ si cada sindicato entrega e nombernan di su candidatonan pa despues tira lot. Esnan cu ta sali gana mester hiba consulta intensivo cu e sindicatonan envolvi pa representa tur sindicato lo miho posibel. Esey ta conta mescos pa tur otro grupo di interes. Esaki ta stimula e compromiso di tur grupo di interes na formacion y control di e maneho di gobierno. E districtonan tambe conoce un procedura di seleccion similar. Aki no ta haci un apelacion riba experticio financiero-economico y huridico, sino mas bien social. Pa un reparticion balansa di e ‘gender’, cada districto ta delega tanto un hende homber y -muhe.
Bentaha
Den e sistema aki di representacion pa medio di grupo di interes, region y tira lot, e ciudadanonan no ta vota directo mas, sino indirecto pa un representante. Pero…ta scucha nan bos hopi miho si! Pasobra aki no ta trata tanto cu hende mes por scoge nan representantenan, pero si nan por influencia nan concretamente. E representacion dobel pa tur ciudadano, esta a base di nan funcion den comunidad Y di nan domicilio, potencialmente ta duna nan mas influencia. Riba dje e gran cantidad di grupo di interes ta haci necesario cu e participacion di ciudadano y bon deliberacion ta bira ‘e normal nobo’. Esaki ta mehora e funcionamento democratico na Aruba substancialmente.
