Diadomingo tabata Earth Day. Un dia pa reflexiona con nos mester biba hunto cu nos Mama Tera y alaves pa ta cauteloso cune tambe.
Esaki no ta facil, pero afortunadamente nos tin personanan manera entre otro Julian Lennon, yiu di e legendario John Lennon. Ela duna den su mensahe relaciona cu Earth Day, algun regla palpable na cual nos, como ser humano por mantene nos mes na dje, pa asina nos por laga atras nos planeta Tera den un bon condicion pa nos yiunan.
Julian Lennon a indica cu no ta e ser humano ta doño di Mama Tera, nos no por haci y deshaci cune manera nos kier sin tene cuenta cu Mama Tera su bienestar. Mama Tera ta duna nos cuminda, aire y material pa por traha nos cas. Pero si nos ta desea algo di dje nos mester pidiele cu respet y duna nos Mama Tera algo bek pa esey.
Y esaki ta exactamente unda e sapato ta preta aki na Aruba. Ta parse manera cu empresanan cu tin solamente ganashi den nan mente, por tuma tur sorto di cos for di nos isla, sin responsabilisa nan mes pa e bienestar di nos Mama Tera, riba cual e comunidad Arubano tambe ta biba.
Den luna di Maart, nos Minister di Husticia tabata un di e promenan cu a demostra corahe, despues di atende cu e kehonan di habitantenan den vecindario di Sero Cristal, y asina a pone temporalmente un paro na e cobamento desastroso y e actividad pa traha concreto di un compania recien estableci.
Habitantenan y Fundacion Conserva Area Cristal a dicidi di tuma accion, pasobra a surpasa e limite di tolerancia y tur habitante a experencia un aumento drastico di molester como consecuencia di e destruccion y cobamento acelera. Ela bira claramente bisto pa hopi den nos comunidad, e grandura di e daño ireparabel (manera DIP tambe ta yam’e) cu a ser haci na nos flora y nos fauna den un zona berde cu ta contene balornan historico y archeologico pa nos pais Aruba.
Mientrastanto tin mas cu 1200 firmante cu a entrega obhesion, entre nan habitantenan cu ta experencia hopi molester y tambe simpatisantenan di casi tur districto di Aruba, contra e peticion pa legalisa e actividadnan comercial y asina haya permiso pa continua cu e destruccion di e area indica.
Ningun di e empresanan den e area ta dispone di e documentonan huridico necesario, den caso aki e permiso di molester. Mirando e aspecto irreparabel di e daño haci caba, ta na su lugar cu e Minister responsabel a pone un paro na e actividadnan, pa duna su mes persona tempo pa investiga con e situacion aki por a ser crea y alaves investiga tambe kiko por ser haci al respecto.
Ta manera Julian Lennon a expresa: “Si bo tuma algo for di Mama Tera, bo ta obliga di pidie su permiso decentemente”
Diamars 17 di April ultimo, Corte a atende un caso sumario den cual e companianan, afecta pa e decision di Minister, a hasi un peticion na Corte pa por continua cu nan actividadnan mientras ta warda riba un decision referente e permiso di molester cu a ser pidi.
Ta spera cu Corte lo dicta un decision dia 7 di Mei venidero.
Tabata sumamente alentador cu Fundasion Conserva Area Cristal y habitantenan a haya oportunidad den Corte pa por a expresa nan opinion.
Durante e sesion, a argumenta pa pone un paro definitivo na tur cobamento y prohibi cualkier sorto di actividad industrial den e area di Sero Cristal, cual area ta ser indica como zona berde riba e mapa di ROP. E tiki area berde cu Aruba ainda tin desponibel mester keda berde tambe. Nos mester trata nos Mama Tera cu respet.
Ta comprendibel cu e e punto di bista describi aki riba ta diametralmente contra e interesnan financiero di e empresanan envolvi. Conservacion di areanan di naturalesa simplemente no ta compatibel cu e concepto di un mina comercial.
Tanto Hues, como tambe e Minister mester skohe entre, e interes di algun trahadornan di e mina y fabrica di beton of e proteccion di Mama Tera pa asina cuida un area oficialmente berde cu ta forma parti di un area limita cu a keda ainda di nos flora y nos fauna pa nos yiunan y nos nietonan.
Si scohe pa e ultimo, e ora nos por bisa cu nos ta cuminsa cana riba e caminda pa duna contenido na e palabranan di Julian Lennon. “Duna Mama Tera algo, pa tur locual Mama Tera a duna nos”
Cada un di nos mester tuma tempo y evalua cua direcsion nos kier bay y cua meta nos kier logra pa nos siguiente generasion. Nos tur mester tuma e curashi y demostra nos deseo tambe pa concretisa esaki.
