Posibelmente pasobra ami a biba afo pa hopi aña, mi no tabatin un amistad estrecho manera mi rumannan tabatin cu nos primo Netto, pero mi aprecio y afecto p’e no tabata menos.
Despues cu Netto a caba na Arubaanse Technische School (ATS) el a bay traha cu “plantsoenering” caminda el a bira conoci pa tur e landscaping cu e grupo a haci na tur parti di Aruba. Na 1975 Netto a habri su Kowloon Restaurant den Emmastraat cerca e cas di Ma Sira caminda e tabata biba. Trahando duro y maneniendo standardnan halto di calidad, smaak y limpieza, Netto a logra haci Kowloon un di restaurantnan Chines mas popular na Aruba.
Mi por conta hopi anecdota di Netto, pero awe mi kier skirbi tocante Netto su admiracion pa nos musica crioyo y su compositor y interpretenan. Dos aña pasa, y Netto y Michael Kuiperi, bon amigo y ferviente fanatico di e musica di Rudy Plaate y Norman Moron a dicidi di organiza un concierto pa duna homenahe na e compositor y e pianista.
Den e Proyecto aki nan a haya hopi ayudo di Percy Jeandor pero na dado momento Netto a pidi mi join e proyecto pa yuda cu publicidad. Como fanatico di e dos musiconan, ami cu gusto a complace Netto. Mi a admira Netto pa su honestidad y su disponibilidad pa yuda caminda e por, y pesey pa ami tabata un placer traha cu Netto y su ekipo pa haci e homenahe un exito. Y un exito grandi el a resulta. A haya cooperacion di artistanan Arubiano manera Robert Thiel, Doedel Sofia, Albert Croes, Rachel Kraaivanger, Etty Toppenberg y varios otro. Den sala cu tabata completamente sold out, por a mira e.o. Padu del Caribe, ex gobernador Olindo Koolman y su simpatico señora Dora.
Na final di e homenahe, Señor Dumfries, Director di Departamento di Cultura, na nomber di Minister di Cultura, a otorga plakkaat di reconocimento na Michael y Netto kendenan a tuma e iniciativo ( y e riesgo financiero) di organisa e concierto di homenahe y Persey cu a traha duro pa realisa e concierto. Asina mi kier recorda primo Netto, no cu anecdota di hopi tempo pasa, pero como co-organisador di e homenahe asina exitoso. E siman aki, Aruba lo despidi di otro gran Arubiano. Paz na su restonan. Forza na Ludmila,Tir Zah, Lisandra y demas famia.
