Desde dia 13 di maart 2020, nada no ta mesun cos mas na Aruba. Nos a drenta den un crisis di salud cu Coronavirus cu despues a pasa pa un crisis economico, cu turismo paralisa, aeropuerto cera y economia stanca. Pero awor den augustus, cinco luna despues, ata nos bek den un crisis di salud publico….pero cu e diferencia cu esun awor ta parce pio cu esun cu nos a sobrebibi e ultimo lunanan tra’i lomba. Awe nos ta para na un crusada cu cantidad di casonan positivo atrobe, anto di transmicion local.
E prome dos dianan di e siman aki a habri cu 10 caso caba, pues 5 caso riba dialuna y despues un otro 5 caso riba diamars. Ta parce cu un ke otro tin di haber cu salimento den club nocturno y bar, cu a ocasiona un situacion explosivo. Banda di e realidad cu testnan ta saliendo positivo, e desaroyo aki ta causa panico, no solamente na Aruba pero tambe na no amigonan den area. Asina Gobierno di Corsou a sali mesora ayera y duna conseho negativo pa biaha pa Aruba, mientras cu Gobierno di Boneiro ta evaluando e mesun ruta. Si e situacion sigui mesun cos of pio, por yega momento cu nos islanan ruman lo dicidi pa cera frontera completo atrobe cu Aruba.
Awe na e “Diagnostic Center” situa den e edificio unda antes tabata Ministerio Publico banda di Zara den Wilhelminastraat, ta wardando mas di 200 persona pa haci test di Covid-19. Esey ta un berdadero record pa nos isla, cu durante “piek” di Coronavirus, un solo biaha, a yega di alcansa apenas 90 test riba un solo dia. Cu awe mester test 200 hende ta duna un indicacion di e explosion di sospecho cu tin riba un lista largo di hende cu tabata den cercania of hunto cu esunnan cu awo ta contagia cu e virus.
Pa algun siman e “Diagnostic Center” tabata hasta cera, pa motibo cu no tabatin test pa haci. E tiki casonan sospechoso tabata manda nan pa Hospital. Pero como cu e siman aki e casonan a explota, a core prepara e luga di nobo, a pone ekiponan den funcion y a aloca empleadonan specialisa pa realisa e tipo di testnan aki. Mester a haci algun cambio den operacion pasobra algun di e trahadonan a bay Aeropuerto pa test pasahero. Awor cu e reto ta mas na cas, enbes di na Aeropuerto, ta enfoca riba e testnan local mes.
E casonan sospechoso awor ta varia, for di esunnan cu ta atende gym mainta, pa esunnan cu ta frecuenta barnan dilanti hotelnan High Rise anochi, como tambe esunnan cu a bishita varios departamento di Gobierno. Hasta tin un caso specifico di entiero cu awor ta bou investigacion debi cu tin contact tracing eynan. A compronde cu varios Polis trahando na Ward’i Noord tambe a bay haci test, debi cu den e ultimo dianan aki a detene varios hende den e area di e club “Gusto” y a trece nan eynan. Pa evita cu den e proceso di detencion y transportacion, por tin contagio, a opta pa bay test.
Ta bon pa splica si cu mester test solamente si Bo tabata den e luganan ey y tabata den contacto cu un persona cu awor ta pashent. Bo mester tin sintoma tambe, sino ta conseha Bo bay den cuarentena preventivo. Mayoria bes ta Bo dokter di cas lo manda Bo pa haci un test asina na DVG of na Hospital. Ta splica e parti aki pasobra tin un diferencia entre Bo mes haci un test preventivo of si Bo dokter di cas manda Bo. E diferencia ta cu si dokter manda Bo, cu AZV ta cubri e test. Si Bo bay riba Bo mes, e lo costa Bo un suma di 250 florin na Hospital of 175 florin na Urgent Care na Noord.
Pa awor no ta keda mucho mas pa conseha tur hende pa mantene distancia social mas cu ta posibel. Aplica reglanan di higiena na tur momento. Evita di ta den luganan yena cu hende y corda cu Gobierno a reintroduci un “samenscholingsverbod” pa evita cu tin mas cu 4 hende para hunto den un area publico. Miho ainda…keda Bo cas!
