Diadomingo siman pasa e atletanan Jansen a biaha pa Barbados bou guia di Head Coach Nicolaas Robert pa asisti na un 2023 World Triathlon Development Regional Pre-Race Camp Barbados, unda nan a siña con pa prepara nan mes pa un careda unda tambe nan a haci test di landamento, coremento y ciclismo.
Despues di un siman di campo di entrenamento nan ta finalisa esaki cu un Campeonato yama 2023 World Triathlon Development Regional Cup Bridgetown, unda e miho atletanan di e region di Caribe a participa.
E rumannan Rebecca y Christiaan Jansen a logra subi podium na Barbados unda e atletanan di Jamaica, Grenada, Trinidad & Tobago y Barbados a participa.
Rebecca a logra gana un medaya di oro y ta laga nos himno “Aruba Dushi Tera” resona na Barbados y Christiaan di su banda a logra gana un medaya di plata den categoria elite.
Mester bisa cu tanto Rebecca y Christiaan a logra un Personal Best. Rebecca a caba e Sprint Triathlon cual ta 750 m landa, 20 km ciclismo y 5 km core na pia den 1:10:19 y Christiaan a caba esaki den 1:01:40. Christiaan tabata un di e atletanan mas hoben den e evento aki y cu solamente 15 aña di edad ta lidera e careda den landamento y ciclismo pero den coremento ta pas’e y ta caba 20 seconde tras di e ganado procedente di Barbabos.
Rebecca a caba su careda despues di su ruman homber Christiaan y a drenta e di tres overall dilanti di tur e otro atletanan masculino y femenino cu a participa.
Rebecca y Christiaan Jansen ta multi-atleta grandi di nos deporte local. Na banda cu ambos ta bon den triathlon cual ta nan deporte principal, Rebecca y Christiaan ta sobresali den e deportenan di coremento y ciclismo tambe ganando y subiendo podium den casi tur careda.
E rumanan Jansen kier a gradici Aruba Triathlon Association pa a duna nan e oportunidad bunita aki pa por a representa Aruba n’e gran evento aki. Danki n’e Federacion di Barbados y Americas Triathlon p’e invitacion. Un danki na Total Services cu a yuda cubri parti di e gastonan.
Danki tambe na tur e coachnan cu a yuda Rebecca y Christiaan durante tur e añanan den e deporte di Triathlon, coremento na pia, ciclismo, landamento y gym.
Diaranson e rumannan a biaha for di Barbados pa Santo Domingo pa competi n’e evento di 2023 Americas Triathlon Junior Qualification Event Punta Cana, unda e paisnan di henter e continente di America lo participa. Aki lo topa cu e seleccion di Aruba cu lo ta biahando diahuebs pa Santo Domingo.
