Diamars dia 18 di juni 2024, Aruba lo tin un chens unico. Parlamento di Aruba lo vota pa di dos biaha riba e ley pa introduci matrimonio civil entre pareha di mesun sexo. Un di dos oportunidad pa reconoce igualdad. Un di dos oportunidad pa manda un señal cla na un minoria den nos comunidad cu no merece di wordo discrimina: Aruba democraticamente ta acepta’bo y ta reconoce bo igualdad. Esaki ta aparece den un declaracion ricibi for di e partido RAIZ.
Tratamento di e proposicion di ley a tuma luga dia 8 di mei 2024. Mester a pusha hopi pa yega na tratamento di e ley. E motibo tawata un diferencia di opinion riba si tin cu warda y laga e decision di Parlamento wordo tuma a base di un decision di Hoge Raad der Nederlanden, den un caso di casacion cu ta cana independientemente di e ley cu ta wordo trata. A wordo splica cu diferente argumento cu no tin motibo valido pa warda riba casacion, y cu tin un balor agrega pa Parlamento expresa su decision democratico.
Dia 8 di mei, votacion a keda empata 10-10. Segun regla, un di dos voto mester tuma luga. Despues di dia 8 di mei, Hoge Raad a cambia e fecha di duna nan veredicto, di 31 di mei 2024 pa 12 di juli 2024. Esaki ta duna Parlamento di Aruba, e representantenan di Pueblo, e espacio necesario pa democraticamente dicidi riba e ley. No ta usual cu Parlamento ta haya un di dos chens pa vota riba un proposicion di ley. Gobierno di Aruba di su banda a laga sa cu si Parlamento aproba e ley, Gobierno lo ratifica (bekrachtig) e ley.
E proposicion di ley ta trata di matrimonio civil (no den misa) y ta un derecho cu nos no por sigui exclui parehanan di mesun sexo for di dje. Conforme Aruba su propio Constitucion, ta prohibi pa nos discrimina otro. E mesun Constitucion ta percura pa libertad di religion. Libertad di religion ta significa cu nos tur por practica un religion di nos escogencia. Hustamente e libertad aki ta trece cun’e cu nos no por impone un religion of creencia riba un otro. Na mesun momento, ta cu bon motibo e ley no ta obliga cualkier religion pa haci casamento entre pareha di mesun sexo den un misa, y ta menciona explicitamente cu ta trata di matrimonio civil.
Aprobacion di e ley tambe lo percura pa para e doctrina di ‘seperate but equal’, cual nos conoce na Aruba como e pensamento cu geregistreerd partnerschap mester ta suficiente pa pareha di mesun sexo, mientras ta exclui nan di matrimonio civil. Esaki ta encera cu nos ta trata un grupo minoritario den nos comunidad como ‘separa’ y exclui for di un derecho civil cu otro si tin.
E decision no ta uno facil pa tur hende, y esey ta comprendibel. Parlamento di Aruba awo ta haya un di dos oportunidad pa vota riba e proposicion di ley. Ban reconoce igualdad, pa e derecho fundamental cu e ta, y pa tur loke e ta significa pa aceptacion di ser humano den nos comunidad.
