Qredits Aruba conhuntamente cu Aruba Bank N.V. a clausura e proyecto educativo di “BeYourOwnBoss” cu un “Final Pitch Event”.
E scol ganado di e Final Pitch Event tabata Commandant Generaal Abraham De Veer School. Un pabien ta bay na e compania “Puppy Yumyums” di e young entrepreneurs: Abigail Martina, Angel Richardson, Victoria Nicholson y Jaydrick Geerman. Un pabien tambe na docentenan Lucy Heim y Edna Vinck pa e guia y entusiasmo durante e programa aki.
Colegio San Antonio a termina na di dos luga cu e compania “JLD Candy” cu tabata presenta door di e young entrepreneurs: Dayenne Croes, Lizienne Maduro y Jayselin Danje. Masha pabien na docente Jennifer Lau pa a yuda y guia e grupo di studiantenan cu nan preparacion pa e evento aki.
Por ultimo, e di tres luga a bay na e compania “Sanchez Swimwear” di EduCampus Aruba. Esaki a wordo presenta door di young entrepreneur Maria Camila Sanchez Gaviria. Danki na docente Anuradha Dwarka pa e preparacion y motivacion di su studiantenan durante e proyecto aki.
Durante e aña escolar e studiantenan a cera conoci cu diferente entrepreneur local, unda nan a comparti nan experencia y conocemento di diferente mercado. Por medio di e tareanan practico, e studiantenan tambe a siña con pa haci un sondeo di e mercado local. Na final cada scol a haya e oportunidad pa presenta nan propio idea di un producto of servicio durante e “Pitch Event”.
Un danki inmenso na tur e ocho scol- y studiantenan cu a participa durante e evento aki. E scolnan cu a participa tabata: De Schakel College, Colegio San Antonio, Mon Plaisir College, Commandant Generaal Abraham de Veerschool, Ceque College, John Wesley College, Filomena College y EduCampus.
Tambe un danki special na nos huradonan: Tisa Lasorte (CEO & President di Aruba Hotel and Tourism Association – AHATA), Gavril Mansur (President di Aruba Chamber of Commerce and Industry), Igmar Reyes (Manager Corporate Customer Service Aruba Bank N.V.) y Oliver Vieira (Risk Manager Qredits Caribbean).
Un gradicimento ta bay na Aruba Bank N.V. pa patrocina e proyecto aki y pa e colaboracion cu sigur a haci un impacto hopi grandi riba nos studiantenan y nan preparacion pa nan futuro carera.
![](https://24ora.com/wp-content/uploads/2023/06/1-1920x1077.jpg)
![](https://24ora.com/wp-content/uploads/2023/06/M3A9343-1920x1280.jpg)
![](https://24ora.com/wp-content/uploads/2023/06/M3A9360-1920x1280.jpg)