Awe mainta a sosode un situacion masha lamentabel, unda cu un Arubiano a perde su bida despues cu el a indica cu e no por sigui cu su bida mas door di e depresion cu e tabata pasando aden. Na prome luga nos pensamento ta cu ne, su famia y amigonan. E ta duro ora un persona ta sufri asina hopi y e ta scoge esaki como su unico salida. Nos ta desea su famia y amigonan tur tipo di sosten posibel y hopi forsa den e tempo dificil aki.
Si nos tira un bista general na Aruba y tambe e sufrimento psikico bou comunidad, lamentablemente nos tin di bisa cu depresion severo y otro enfermedad mental ta hopi comun. Cifranan internacional y resultado di encuesta haci bou di 75% di dokternan di cas ta indica cu mas o menos 10.000-12.000 Arubiano mester di ayudo profesional cu nan salud mental. Na e momento aki 8.000 di e grupo aki no ta ricibiendo ningun tipo di ayudo pa cu esaki, aunke nan tin derecho pa haya esaki.
E crisis di Covid-19 a haci e situacion aki hopi mas pio. Tin mas depresion, abuso di alcohol, violencia domestico, trastorno di anciedad, trauma psicologico, etc. E presion riba cuido en general, no solamente cerca Respaldo, pero tambe cerca dokternan di cas, SPD y FMAA a crece enorme. Pa Respaldo esaki lastimamente tambe ta nifica cu pa algun tempo nos no por duna un fecha pa un cita (intake) mas. E tempo di espera pa esaki por dura actualmente den cierto caso te hasta un (1) aña.
Desde comienso di e crisis Respaldo a bati alarma cu mester inverti mas den e cuido di salud mental. Mester hopi mas capacidad di tratamento. Specialmente den tempo dificil economicamente, tin mas preshon riba comunidad, mas stress, mas sufrimento, mas anciedad. Lamentablemente e inversion aki no a sosode, sufrimento a crece mas y lista di espera tambe, manera nos a indica algun siman pasa den un rueda di prensa.
Den Reino, Aruba ta hopi atras den cantidad di persona cu por traha pa e cuido di salud mental y tambe den e cantidad cu ta wordo inverti den e cuido aki compara cu Corsou, islanan BES y Hulanda. AZV no tin e espacio den su presupuesto pa por duna e servicio di cuido necesario aki. Pa e motibo aki Respaldo a puntra algun siman pasa na Gobierno pa entrega un peticion na Reino Hulandes pa sosten pa por yuda e cantidad adicional di personanan cu tin mester di cuido a consecuencia di e crisis di Covid, di mesun manera cu hospital a ricibi extra capacidad di cuido intensivo pa yuda pashentnan di Covid. Nos ta spera cu pronto algo lo wordo haci cu nos peticion pa ayudo.
“Na e momento aki tin sigur 7000 Arubiano cu ainda no ta haya e cuido cu nan mester di dje. Nos ta kere cu nos por yuda por lo menos mita di e grupo aki si nos ricibi algun adkisicion relativamente simpel, riba locual nos ta haciendo caba. Solamente door di brinda e cuido necesario pa salud mental na e comunidad di Aruba, tragedianan manera esun di awe, lo por wordo preveni y e chens cu famianan pa resto di nan bida mester sinti falta door di e perdida di un yui, ruman, tata, mama of otro ser keri lo ta hopi menos”, asina psikiatra, dr. Hendrikus van Gaalen a duna di conoce.