Ta fresco den memoria di hopi hende e caso cu a tuma luga na warda di polis di Shaba ora cu un detenido, e cantante y compositor Antoni Gario, a pone fin na su bida durante su detencion. Ora cu e Comision Europeo pa Prevencion di Tortura y Maltrato a bishita e warda, a constata cu no tin un protocol pa atende cu un situacion asina aki. Pero tambe a menciona con e personanan mester kita sunu pa revisa nan of te hasta ta blindfold algun, nan ta desaproba e accion aki.
Nan mes a topa cu algun persona cu tabata agita, burachi of tin riesgo di comete suicidio ora cu ta den custodia policial y cu a wanta nan casi 10 dia sunu (of na jockey) den un cel na warda policial. E polisnan cu nan a topa a confirma cu esaki tabata e procedura cu nan ta obliga pa sigui.
Den cuadro di esaki un biaha mas a trece dilanti cu mester bin un protocol cu por aplica riba e personanan cu ta na riesgo di causa daño na nan mes of comete suicidio. Mester pone e personanan aki den un cel cu no tin punto pa mara nan mes of cu paña cu nan no por uza pa cualkier acto. Mester pone nan bou observacion special y mester ta bou atencion di un profesional. Ta totalmente inapropia pa pone un persona cu riesgo di comete suicidio sunu den un cel sin e apoyo necesario. Un trato asina, segun e comision, ta humiliante y mester pone un fin n’esaki. Den cuadro di e ariba menciona, ta recomenda pa bin cu un protocol di cuido p’e personanan deteni cu riesgo di comete suicidio ora nan ta den cel, teniendo cuenta cu e puntonan ariba menciona.
E asunto di kita un persona su pañanan pa listr’e y haci tres squats ta un medida invasivo y degradante y cu por ta traumatico p’e personanan cu a pasa den violencia sexual. Pa evita berguensa, ta miho pa no kita nan completamente sunu di un solo biaha. A conseha pa kita e parti di ariba, pone bek prome cu kita resto di paña. Esaki mester ta e sistema uza na tur warda.
A haya comentario cu a blindfold algun persona durante strip-search. E comision no ta mira con por hustifica esaki.
Pa blindfold un persona den custodia policial, particularmente un persona den interogacion, transporta di un caminda pa otro, ta un forma di opresion. E efecto di esaki riba e persona concerni ta conduci frecuentemente na maltrato psicologico. Ta conseha autoridad pa prohibi e sistema di blindfolding di e personanan cu ta den custodia policial.
A constata cu na ward’i Shaba tin un cel special p’e mulanan, esunnan cu a guli bolita cu ta ekipa cu un toilet special, pa evacua cualkier tipo di droga cu detecta. Normalmente ta yama un dokter y e resto di tempo e persona ta keda deteni ey. Ora cu saca e droga, ta hiba e persona hospital pa control medico of pa saca potret.
CPT ta kere cu ademas di ekipo specialisa, e detencion di e personanan asina mester bay bou di supervision medico, debi na e riesgo halto di intoxicacion si un di e empakenan aki por rementa, como tambe e riesgo di obstruccion n’e tripanan, di cual ambos por conduci na morto. E miho practica ta pa pone nan bou di supervision medico na hospital en bes di warda di polis.
