Mientras cu promotor di tur otro festival si a sigui organisa concierto y trece artista di afo pa presenta na Aruba, cerca Louis Oliver Luna no t’e caso. Luna ta promotor di e festival Dushi Vibe. Kende a bende ticket na aña 2020 pa un supuesto concierto caminda e artista principal cu lo a presenta, tabata Daddy Yankee.
Tur dia ta mira comentario riba rednan social tocante e festival y nan placa. Si tuma ehempel, Celebrando Bida Concert. E promotor di e festival a organisa no un sino dos concierto despues di pandemia. Ultimo biaha cu a puntra Luna su reaccion riba e concierto, el a comenta cu ta pa via di pandemia. Tur cos a habri y e promotornan a ricibi permiso pa organisa concierto, mientras tanto nada di Daddy Yankee.
Louis Oliver Luna ta fotografo di prome minister di Aruba, a acerc’e na su salida di Cocolishi pa puntr’e su reaccion riba e asunto di ticket. E no tin comentario, mientrastanto e fanaticonan cu a cumpra ticket no sa kico ta bay pasa cu nan placa. Ta papia di miles di florin na ticket y e promotor no ta sali pa duna cara, unico manera pa hay’e ta sea na un actividad unda Prome Minister Evelyn Wever-Croes ta asisti of na pi’i trabou.
Segun e mesun Facebook page di Aruba Dushi Vibe Festival, nan lo tabata “trahando” riba un fecha pa e gran concierto di Daddy Yankee. Y e ultimo post ta di 20 di maart, esey kiermen, casi dos aña despues di cu e concierto mester a tuma luga, ta bin tira santo den wowo di e fanaticonan cu, prome cu e cantante retira, e lo tene su concierto na Aruba.
Loke e fanaticonan di e cantante kier scucha for di e promotornan ta unda y ki dia nan ta haya nan placa bek! Nan tin mas di shen mil florin den nan posesion di e placa cu e publico a paga pa nan entrada, aña 2022 ta cabando y ainda no tin solucion p’esaki! Na Peru hasta a detene un estafado di ticket di Daddy Yankee.
