Den cuadro di recauda fondo pa drecha nan studio di baile a organisa un evento di baile pa Aruba. Pierangely Wever ta docente di baile, manera ta conoci, na nan studio di baile situa den Cas di Cultura, ta nota un decadencia na e edificio. Dak a cuminsa bin abou, airco no ta traha mas, awa ta basha den e luga en fin, e tin mester di atencion. Den cuadro di esaki a dicidi di prepara un show p’asina no solamente recauda fondo sino pa pueblo disfruta tambe di un tremendo presentacion.
Ta trata di tres dia di presentacion; diabierna, diasabra cu dos funcion y diadomingo. E show ta titula Dance Light Camera y ta tuma luga di Masc Aruba den Dominacenessenstraat. Wever a conta cu e ta encanta presenta den Masc Aruba mirando cu ta un studio mas chikito y e pueblo por ta mas cerca di e bailarinanan pero tambe por presenta dilanti un grupo mas chikito. E prome show diabierna a bay den bon ambiente y e publico a disfruta un monton. A presenta diferente tipo di baile, por pensa aki riba urbano, reggeaton, dancehall, moderno, jazz y hasta folklor.
No ta trata di unicamente di e grupo di Wever sino tambe di diferente scol di baile na Aruba entre otro di su señora mama. Tambe tabatin un chispa di presentacion di e docente di baile, Kevin Gumbs. E muchanan cu a participa ta cuminsa for di shete aña y ta bay te na e bailarina di mas grandi cu tin setenta aña. Tin diferente beneficio ora di baila. E ta yuda e muchanan pa desaroyo nan abilidad social, comunicativo y hasta mental. Ta invita pueblo pa esunnan cu no a logra mira e show pa cumpra nan ticket na Plaza Bookshop p’asina yuda nan logra nan meta di drecha e airco di nan studio y parti di e ‘kleedkamer’ caminda tin mester di un atencion urgente. Tambe por aprecia for di e muchanan mas nobo den e grupo di baile, kende a cuminsa na luna di augustus apenas, te na esunnan cu tin mas cu cuater aña den e grupo.
