Manera ya ta conoci, diahuebs marduga Rusia a inicia un operacion militar na Ucrania. Ta papia di un invasion Ruso den cual ya a informa di varios morto como tambe herido di e banda civil y militar.
Reaccion di Occidente, entre otro Merca y Union Europeo, tabata pa impone sancion fuerte riba Rusia. Mas cu claro esakinan por trece consecuencia cu nan pa henter mundo, pues no ta descarta cu lo tin efecto riba Aruba tambe.
Den un discurso di nos prome minister mr. Evelyn Wever-Croes, el a splica cu nan ta bezig ta monitor e situacion aki di cerca y a cualifica esaki di un ‘shock’ externo cu nos no tin ningun influencia riba dje. A enfatisa cu a pesar cu e conflicto mes ta tumando luga casi 10.000 kilometer leu, cu e globalisacion actual, sin duda esaki lo tin efecto pa nos tambe. A pidi pa tur sea alerta y prepara, pero a pidi si pa no drenta panico.
Asina e prome mandatario a sigui splica cu gobierno ta haciendo tur lo posibel pa keda bon informa di e situacion pa asina tuma e miho decisionnan pa nos pais y cada ciudadano di nos pais. Cu esaki kier ta prepara pa mitiga e efectonan cu ta bin cu e conflicto aki y garantisa siguridad nacional di nos pais. Ta sinti si cu e invasion di Rusia no lo tin un efecto directo riba nos isla, pero sin duda algun, lo tin su efecto indirecto.
Pa un relato mas amplio lesa edicion di TREMPAN.
