Prome Minister Gilmar “Pik” Pisas a bay personalmente na stadion pa saluda tur e ekiponan di baseball hubenil cu ta participa den e campeonato regional di Junior League World Series. A scoge Corsou pa ey hunga e weganan di Latino America y Caribe den cual Aruba tambe ta participa. Premier Pisas, cu siman pasa tabata na Aruba y a probecha mira e wega final di futbol, a topa cu e delegacion di Aruba y a saca potret cu nan gritando “Ta mi hendenan”. E politico cu mas voto den historia di Pais Corsou no ta sconde su amor special pa Aruba!
E campeonato internacional di Junior League World Series ta tuma luga durante un siman unda e miho ekiponan di baseball di muchanan di 13 pa 14 aña for di rond mundo ta enfrenta otro. A funda e campeonato desde aña 1981. Mester bisa cu e categoria Junior League World Series ta e “ruman grandi” di e Little League World Series cu ta organisa anualmente na South Williamsport, Pennsylvania, di e miho ekiponan di basebolistanan di 12 aña. E Junior League a cuminsa como un campeonato di mucha di 13 aña pero na caminda a inclui 14 aña tambe y awendia ta conta cu participacion di ekiponan for di Europa, Medio Oriente, Africa, Latino America, Asia-Pacifico, Canada y Merca.
Pa loke ta e Junior League Baseball Latin America Region Tournament, ta tuma luga entre 17 pa 22 di juli 2023 na nos isla ruman Corsou. E paisnan participando ta Aruba, Corsou, Panama, Nicaragua, Venezuela y Mexico.
Mester menciona cu e weganan a cuminsa di ayera mientras cu e wega final pa campeon di Latino America ta tuma luga diasabra awo. Lamentablemente e prome weganan di Aruba, nks basebolistanan no a logra domina y a perde tur wega. Mester bin un cambio lihe, sino e chens ta grandi cu Aruba ta cay afo. Pero esey nos lo informa den un articulo separa.
