Diabierna ultimo un delegacion di Aruba, forma pa ex-Prome Minister di Aruba y alabes lider di oposicion, mr. Mike Eman a biaha pa Corsou pa un bishita di trabou. Durante e bishita a nota cu a ricibi e delegacion Rubiano cu porta habri. A bishita entre otro Gobernador di Corsou y Prome Minister di Corsou. Durante e bishita na Forti, esta e centro di gobernacion di Corsou, Prome Minister, mr. Gilmar Pik Pisas a ricibi Eman cu brasa habri. Manera cu el a habri porta el a bisa: “Conta mi ruman, bonbini!”
E lider di oposicion di Aruba y e prome minister di Corsou a reuni pa basta largo. Eman mescos cu el a haci na Hulanda, el a haci na Corsou tambe. El a entrega su plan cu e tin pa institui un asina yama Sociaal Cultureel Plan Bureau pa Aruba. Un bureau asina lo cumbini Corsou tambe.
Eman a conta cu un plan asina ta sirbi pa mira e realidad cu pueblo ta bibando aden pero tambe pa mira reto economico y e peso cu tin riba e pueblo. A conta Pisas riba e plan pa e fiansa cu e islanan tin cu Hulanda. E plan ta prueba cu a traha entre otro na Portugal caminda a converti e debe den inversion. A intercambia varios idea.
Premier Pisas ta contento cu e bishita. E prome mandatario di Corsou ta sinti cu tipo di bishita asina ta importante. E tabata un reunion fructifero y cu plannan grandi y realistico pa tanto Aruba como Corsou. Riba e Sociaal Cultureel Plan Bureau, Pisas ta sinti cu por hasta uz’e ora ta negocia cu CFT, p’asina realmente demostra e realidad di e pueblo y ki peso e fiansa tin riba e presupuesto di e paisnan, caminda ta laga masha poco espacio pa haci inversion.
Riba e plan pa converti e debe di paisnan den inversion, Pisas a conta cu e ta bay studie pero ya caba por cuminsa na indica cu, “e ta un bon plan”, e prome mandatario a expresa. E ta spera cu pronto e lo ta na Aruba, cu ta su di dos cas p’asina sigui combersa cu tanto gobierno na turno pero cu lider di oposicion tambe, pa forma un bloke pa por negocia cu Hulanda.
